Ձեր վստահելի աղբյուրը

Տեղական ինքնակառավարումը կառավարման կարևորագույն համակարգ է: Դրանից է կախված քաղաքացու կենսաապահովման խնդիրների լուծումը: Այդ է պատճառը, որ ՏԻՄ համակարգում բարեփոխումներ անելու համար պետք է նախ հասկանալ այդ ոլորտի նպատակներն ու խնդիրները: Այսօր կայացած մամուլի ասուլիսի ժամանակ այս մասին ասաց «Քրիստոնեա-ժողովրդավարական վերածնունդ» կուսակցության նախագահ Սոս Գիմիշյանը՝ ափսոսանք հայտնելով, որ Հայաստանում ՏԻՄ համակարգի էությունը հասկացող ընդամենը մեկ-երկու մարդ կա:

«Ակնհայտ է՝ խոշորացված համայնքների սակավ բյուջեները բերելու են նրան, որ դրանք սկսելու են դանդաղ մահանալ: Եվրոպայում, մինչդեռ, բոլորովին այլ պատկեր է: Այնտեղ համայնքների խոշորացումը կայացած համակարգ է: Եվրոպայում առկա են համայնքները իրար կապող գերազանց ճանապարհներ, մշտական տրանսպորտ: Իսկ ահա Հայաստանում նույնիսկ մի քանի կիլոմետրով իրարից հեռու համայնքները խիստ դժվարությամբ են կապվում միմյանց: Հերիք է ձյուն գա, և դրանք ուղղակի մեկուսանում են իրարից, սկսում մեռնել»,- ասաց Սոս Գիմիշյանը:

Բանախոսն անթույլատրելի համարեց, որ ՀՀ իշխանությունները փորձում են նման անհեռանկար ծրագիր կյանքի կոչել: Նրա խոսքով, համայնքների խոշորացումը բարեփոխում չէ, այլ չարիք, որի պտուղները կերևան տարիներ անց:

«Կառավարությունը մասնակիորեն չի գիտակցում, մասնակիորեն էլ գիտակցում է՝ ինչ է անում: Մյուս կողմից, չի բացառվում, որ համայնքները խոշորացվում են, որպեսզի իշխանությունը սեփական վերարտադրման հարցն ավելի հեշտ լուծի»,- ամփոփեց Սոս Գիմիշյանը: