Ձեր վստահելի աղբյուրը

Վարչական դատարանը քննում է «Երկիր ծիրանի»-ի դիմումը՝ Երևանի ավագանու ընտրությունների վերաբերյալ ԿԸՀ որոշումը բողոքարկելու մասին: Հայցվոր կողմի շահերը ներկայացնող  փաստաբան Արմեն Գաբրիելյանը առաջարկեց հետաձգել նիստը, քանի որ «Ելք» դաշինքի ներկայացուցիչները ներկա չեն, միգուցե ճանապարհին խցանման մեջ են մնացել:

ԿԸՀ քարտուղար Արմեն Սմբատյանն ասաց, որ դեմ է միջնոդությանը, քանի որ դաշինքի անդամները ծանուցվել են նիստի մասին սահմանված պատշաճ կարգով:

«Երկիր Ծիրանի» կուսակցության ներկայացուցիչը պնդեց միջնորդությունը, ասաց, որ  նոր է ներգրավվել գործում, պետք է ծանոթանա նյութերին, լրացնի ապացույցները:

Դատարանը  չբավարարեց միջնորդությունը, ներկայացրած հիմքերը բավարար չեն, քննությունը պետք է  իրականացվի սեղմ ժամկետում:

«Հայց ներկայացվող կողմում քանի հոգի է ծանոթ նյութերին. ներկայացել է մի ներկայացուցիչ, ով ծանոթ չէ: Ենթադրվում է, որ հայցվորը պետք է ծանոթ լինի հայցին, իսկ դուք առաջարկում եք, հետաձգենք, որ հայցվորը ծանոթանա հայցին»,-ասաց դատավորը, առաջարկելով, ներկայացնել բացման խոսքը:

Այն ներկայացրեց Զարուհի Փոստանջյանը: Հայցադիմումը ներկայացնելիս դատավորն ընդհատեց Փոստանջյանին, վերջինս դա որակեց որպես Բաղրամյան 26-ի կողմից տրված պատվեր:

«Դուք անհարգալից վերաբերմունք եք ցուցաբերում դատարանի նկատմամբ: Դուք այստեղ քաղաքական ակցիա չեք իրականացնում»,-ասաց դատավորը:

Դատավոր-Փոստանջյան բանավեճին միջամտեց դատարանի դահլիճում գտնվող կանանցից մեկը, դատավորը կարգադրիչներին խնդրեց կնոջը հեռացնել դահլիճից:

«Չեմ հեռանալու, թողեք մարդն իր խոսքն ասի: Սա ի՞նչ է, բռնապետություն է:  Չեմ գնում, բերեք, ձերբակալեք: Նստելու եմ լսելու բացման խոսքը»,-բղավեց Ստելլա Աղաջանյանը:

Ի պատասխան դատավորները հեռացան դահլիճից, ինչին հետևեցին ծափահարություններ ու «Էդ է ձեր արդարադատությունը» բացականչություններ:

Դահլիճում ներկաները չհասկացան, թե ինչու հեռացավ դատարանը, ընդմիջո՞ւմ է, պե՞տք է սպասեն, թե՞ ոչ:

Այս պահին հայցվոր ու պատասխանող կողմերը սպասում են դատավորների վերադարձին