Ձեր վստահելի աղբյուրը

Հայաստանում է աշխարհահռչակ շանսոյնե Շառլ Ազնավուրը:  ՀՀ ԱԳՆ ֆեյսբուքյան էջից տեղեկանում ենք, որ  «Զվարթնոց» միջազգային օդանավակայանում նրան ողջունել է ՀՀ արտաքին գործերի նախարար Էդվարդ Նալբանդյանը: 

Մայիսի 28-ին նա ներկա է լինելու Երևանում կայանալիք «Ավրորա» մրցանակաբաշխության արարողությունը: Մայիսի 29-ին Ա. Սպենդիարյանի անվան օպերայի և բալետի ազգային ակադեմիական թատրոնում Շառլ Ազնավուրը ներկա է լինելու իրեն նվիրված  «Լա Բոհեմ» մեկ գործողությամբ բալետային ներկայացման առաջնախաղին: Բեմադրության սցենարի հեղինակը և բեմադրող խորեոգրաֆն է  Ռուդոլֆ Խառատյանը: Հունիսի 1-ին շանսոնյեն ներկա է լինելու «Քեզ համար, Ազնավո′ւր» խորագրով համերգին: Դիրիժոր Էդուարդ Թոփչյանի ղեկավարությամբ հայ ճանաչված օպերային և էստրադային երգիչ-երգչուհիները կկատարեն Ազնավուրի հայտնի ու սիրված երգերը՝ սիմֆոնիկ նվագակցությամբ։

Երգիչ, կոմպոզիտոր, բանաստեղծ,  դերասան, Հայաստանի Ազգային հերոս Շառլ Ազնավուրն իր երգարվեստով ստեղծել է ինքնատիպ դպրոց: Նրա երգերն ակունքներով կապված են հայկական տաղերի հետ և մեծ ճանաչում ունեն: Նա ավելի քան 1000 երգերի հեղինակ է, նկարահանվել է ավելի քան 60 ֆիլմերում, վաճառվել է երգչի ավելի քան 100 միլիոն սկավառակներ: Իր կյանքի ընթացքում նա երգել է համաշխարհային այնպիսի աստղերի հետ, ինչպիսիք են Ֆրենկ Սինատրան, Սելին Դիոնը, Լուչիանո Պավարոտին, Պլասիդո Դոմինգոն, Պատրիսիա Կաասը, Լայզա Միննելին և այլն:

Բազմաթիվ մրցանակների դափնեկիր է, պարգևատրվել է Ֆրանսիայի Պատվո լեգեոնի 2 շքանշանով:  2009 թ-ին Ազնավուրը ճանաչվել է XX դարի լավագույն երգիչ: 2009թ. մայիսի 4-ից` Ժնևի ՄԱԿ-ի գրասենյակում և այլ միջազգային կազմակերպություններում Հայաստանի Հանրապետության մշտական ներկայացուցիչ, 2009թ. մայիսի 5-ից` Շվեյցարիայի Համադաշնությունում Հայաստանի Հանրապետության արտակարգ և լիազոր դեսպան: