Ձեր վստահելի աղբյուրը

Կարևոր է լրատվամիջոցներով հաղորդել փախստականների հետ կապված և հաջողված, և սարսափելի պատմությունները, երկուսն էլ պետք է լուսաբանել: «Aurora Dialogues-2017» քննարկումներին «Լիցքավորելով աշխարհը» խորագրով քննարկմանն ասաց նիգերիացի և ամերիկացի լրագրող Չիկա Օդուան՝ խոսելով մեդիայի դերի մասին:

Նա նշեց, որ «Բոկո Հարամ» ծայրահեղական խմբավորումը Նիգերիայում բազմաթիվ աղջիկների է փախցրել, որոնց մեծ  մասը մեծ դժվարությամբ վերադարձել են տուն, գտել իրենց ծնողներին:

«Չափազանց կարևոր է ներկայացնել այս պատմությունները, ինչպես են վերադարձել տուն, ինչպես են նրանք հոգեբանական, սոցիալական աջակցություն ստացել: Միաժամանակ կարևոր է  ներկայացնելու այն սարսափելի պատմությունները, որոնք տեղի են ունենում նույն այդ աղջիկների կամ մյուս փախստականների հետ»,- նշեց նա:

BILD օրաթերթի փոխխմբագիր Ֆլորիան Ֆոն Հայնցը նախ ասաց, որ պետք է սահմանել, թե ինչ է նշանակում լրատվամիջոց:

«Խոսում ենք լրատվամիջոցների դերի մասին, բայց լրատվամիջոցներն ու լրագրողներն այլևս տարբեր են, տարբեր աշխատանքներ են իրենց բնույթով: Կան սոցիալական ցանցեր, կա սոցիալական լրատվություն: Մենք կարող ենք Ֆեյսբուքն օգտագործել որպես հարթակ, բայց այս հարթակը երբևէ լրագրող կամ լրագրողական չի դառնա: Եթե ուսումնասիրենք սոցիալական ցանցերը, օրինակ, Ֆեյսբուքը,  կհասկանանք, որ այնտեղ ներկայացվում է տեղեկատվություն, որն իր լավագույն նկատառումներով չի հաղորդվում մեզ, միգուցե փաստեր այնտեղ չկան: Ես նույնիսկ տեղեկատվություն չեմ ցանկանում այն անվանել: Միգուցե, ասեկոսեներ»,- նշեց նա:

Ֆ. Ֆոն Հայնցի խոսքով, բազմաթիվ փախստականներ, դժբախտաբար, իրենց հույսը դնում են հենց այս չստուգված տեղեկատվության վրա, չեն ծանոթանում պաշտոնականին:

«Հենց այդ ասեկոսներին հետևելով՝ մարդիկ սխալ ճանապարհներ են բռնում, այնպիսի փոխանցման միջոցներում են հայտնվում, որ բերում է մահվան: Կամ լսում են, որ եթե գնան Գերմանիա, կարող են նաև իրենց ընտանիքներին տեղափոխել, բնակարան ստանալ: Հենց այդ պատճառով էլ շատ փախստականներ գնացին Գերմանիա, որովհետև ճշգրիտ աղբյուրները չէին աշխատում»,- ասաց նա: