Ձեր վստահելի աղբյուրը

«Ավրորա» մրցանակաբաշխության ներկա է Հայաստանի ֆուտբոլի ազգային հավաքականի ավագ  և «Մանչեսթեր Յունայթեդ»-ի կիսապաշտպան Հենրիխ Մխիթարյանը: Միջոցառումը վարողն ասաց, որ Հայաստանն աշխարհին տվել է գիտնականների, երաժիշտների, պայծառ, տաղանդավոր մարդկանց:

Նա հատուկ հայտարարեց, որ միջոցառմանը ներկա է Հենրիխ Մխիթարյանը, շնորհակալության հայտնեց նրան մրցանակաբաշխությանը մասնակցելու համար:

«Յուրաքանչյուր հանդիսատես, ով ներկա է այստեղ, տեսել է նրա փայլուն գոլը: Շնորհավորում ենք նրան հաղթանակի առիթով»,- հայտարարեց միջոցառումը վարողը:

Հիշեցնենք, որ այսօր  նախագահ Սերժ Սարգսյանի հրամանագրով Հենրիխ Մխիթարյանը պարգևատրվել է «Հայրենիքին մատուցած ծառայությունների համար» 1-ին աստիճանի շքանշանով:

Հիշեցնենք նաև, որ մայիսի 25-ին Եվրոպա լիգայի խաղարկության եզրափակիչ խաղում Ստոկհոլմում հանդիպել էին հոլանդական «Այաքս»-ն ու անգլիական «Մանչեսթեր Յունայթեդ»-ը։
Վերջինս  հաղթանակ է տարել 0:2 հաշվով: Գոլի հեղինակ է դարձել Հենրիխ Մխիթարյանը։ Նա առաջին հայ ֆուտբոլիստն է, ով մասնակցել է Եվրոպա լիգայի խաղարկության եզրափակիչ հանդիպմանը։ Նա խաղադաշտ դուրս էր եկել Հայաստանի դրոշով։