Բիզնեսը պետք է ներգրավված լինի միգրանտների խնդրի լուծման գործում. Փ. Փոլման

Հասարակություն 14:06 28/05/2017 Հայաստան

Բիզնեսը պետք է ներգրավված լինի միգրանտների խնդրի լուծման գործում. Փ. Փոլման

«Փախստականները, ովքեր հայտնվում են մի երկրում՝ չիմանալով լեզուն, օրենքները, չունենալով արտոնություններ, հենց այդ պատճառով էլ պետք է ունենան խիզախություն, նվիրված ինչ- որ նպատակին»,- «Aurora Dialogues» քննարկումների «Միգրացիան և բիզնեսի դերը» խորագրով քննարկմանն ասաց «Ավրորա» մարդասիրական նախաձեռնության համահիմնադիր Նուբար Աֆեյանը:

Նա նշեց, որ փախստականները ծայրահեղական միգրանտներ են, յուրաքանչյուր հասարակություն, որտեղ հայտնվում են, փոփոխություններ են տեղի ունենում, աշխատատեղեր են ստեղծվում: Ն. Աֆեյանի կարծիքով, նրանք կարող են լինել նորարարներ այդ երկրներում:

Քննարկմանը ներկա Մեքսիկայի նախկին նախագահ, Յեյլի համալսարանի գլոբալիզացիայի ուսումնասիրությունների կենտրոնի տնօրեն Էռնեստո Սեդիլյոն նախ հիշեցրեց, որ խնդիրը, որի առջև կանգնած են, Աստծո կողմից տրված չէ, կամ բնական աղետի, երկրաշարժի հետևանքով առաջացած, այլ մարդածին, արհեստածին խնդիրներ են: Նա նշեց, որ Սիրիայից արդեն 10 միլիոն մարդ է տեղահանվել, ինչը պատերազմի հետևանք է, Հարավային Սուդանում դրամատիկ մարդասիրական ճգնաժամ է, մեկուկես միլիոն մարդ է տեղահանված, յոթ միլիոնը հումանիտար աջակցության կարիք ունի, 100 հազար մարդ սովի է ենթարկված, մեկ միլիոնը սովի ռիսկի:

«Սա արդյո՞ք բնական աղետ է կամ դրա հետևանք: Ոչ: Սա իշխանության պայքար է, որում պայքարողները մոռանում են բնակչության մասին: Հետևաբար, անհրաժեշտ է միմյանց կրկին ու կրկին հիշեցնել, որ կա հիմնապատճառ»,- ասաց Է. Սեդիլյոն:

Քննարկմանը ներկա Unilever ընկերության գլխավոր գործադիր տնօրեն Փոլ Փոլմանը համաձայնվեց Մեքսիկայի նախկին նախագահի այն դիտարկմանը, որ անհրաժեշտ է փոքր-ինչ պատասխանատու քաղաքական միջավայր, միաժամանակ հավելեց, որ անհրաժեշտ է բիզնես համայնքն էլ հանձնառություն ստանձնի:

«Բիզնեսմենը պետք է հասկանա, որ պետք է այդ խնդրի լուծման մասը լինել: Այս պահին այս մարտահրավերներին չդիմակայելը կարող է ի վերջո ավելի վատ ծախսեր առաջացնել այդ բիզնեսների համար: Այս գաղափարն է պետք հասցնել նրանց»,- ասաց Փ. Փոլմանը:

Նա նաև նշեց, որ փախստականների մեծ մասը հմուտ աշխատողներ են, հմուտ աշխատուժ է:

«Չափազանց կարևոր է նշել, որ կառավարությունները ձախողում են շարունակաբար, չեն գտնում համապատասխան լուծումներ»,- հավելեց Փ. Փոլմանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: