Ձեր վստահելի աղբյուրը

«Վերջին 20 տարում միգրանտների իրավունքներով եմ զբաղվում: Այս տարիների ընթացքում ակնհայտ է, որ միգրացիան ոչ միայն կառուցվածքային երևույթ է, այլ նաև բազմաշերտ»,- «Aurora Dialogues» քննարկումների «Միգրացիա. Ճգնաժամից դեպի ինտեգրում» խորագրով քննարկմանն ասաց  պրոֆեսոր, ՄԱԿ-ի՝ միգրանտ աշխատողների և նրանց ընտանիքների հարցերով հանձնաժողովի փոխնախագահ Պաբլո Սերիանի Սերնադասը:

Նրա խոսքով, միգրացիոն քաղաքականությունն ավելի ու ավելի ձևավորվում է նեղ մոտեցմամբ, որն ավելի շատ հիմնված է առասպելի, կարծրատիպերի վրա, և ոչ թե փաստերի:

«Ավելի շատ քաղաքական և տնտեսական կարճաժամկետ շահերի վրա է հիմնվում, քան  համակողմանի մոտեցման, որն ընդգրկում է իր մեջ կարճաժամկետ և երկարաժամկետ արձագանքները, որպեսզի հասցեագրվի այս կառուցվածքային երևույթը»,- ասաց նա:

Պ. Սերնադասի կարծիքով, միգրացիոն քաղաքականությունները  պետք է կոչվեն պետական ընդունման  քաղաքականություններ, քանի որ մարդու հիմնարար իրավունքը, որը պետք է պաշտպանվի, ինչպես նաև օրենքի գերակայնության հիմնական սկզբունքները չեն կիրառվում միգրանտների դեպքում, հատկապես նրանց դեպքում, ովքեր գտնվում են անորոշ վիճակում:

«Առանցքայյին կարևորություն ունի համապարփակ միգրացիոն քաղաքականության մշակումը, որը կընդգրկի միգրացիայի բոլոր հարթությունները: Միգրացիան պետք է լինի նաև կրթության, առողջապահության, սոցիալական ապահովման պատասխանատու մարմինների ուշադրության կենտրոնում»,- նշեց նա

Քննարկմանը ներկա ՄԱԿ-ի փախստականների հարցերով գերագույն հանձնակատարի՝ Մոսուլի գրասենյակի ղեկավար Հովիգ Էթյեմեզյանը նախ ասաց, որ հայկական ծագում ունի, ծնողները հայ են, ծնվել են Լիբանանում, նախնիները փրկվել են Հայոց ցեղասպանությունից:

Նա նշեց, որ այն, ինչ արվում է փախստականների համար, ընդամենը նրանց կարիքների մի չնչին մասն է բավարարում: Հ. Էթյեմեզյանը միաժամանակ ընդգծեց, որ  փախստականները, միգրանտները նաև մարդկայն դրական կապիտալ են:

SEED հիմնադրամի նախագահ և գործադիր տնօրեն Շերի Քրահամ Թալաբանի խոսքով, փրկված փախստականներին անհրաժեշտ է երկարաժամկետ, ամբողջական, համակողմանի մոտեցում՝ հոգեկան, ֆիզիկական առողջություն, տնական պայմաններ, պարզապես աջակցություն, որը չափազանց կարևոր է ապաքինման համար: