Ձեր վստահելի աղբյուրը

Ազգային ժողովի արտահերթ նիստում 58 կողմ, 11 դեմ և 19 ձեռնպահ ձայների հարաբերակցությամբ առաջին ընթերցմամբ ընդունվեց «Հայաստանի Հանրապետության կառավարության կառուցվածքի մասին ՀՀ օրենքում փոփոխություն կատարելու մասին» և կից ներկայացված օրենքների նախագծերի փաթեթը:

«Մեր նախաձեռնությունը գրավոր ուղարկված է կառավարություն: Մենք այսօր առաջին ընթերցմամբ դեմ կքվեարկենք, եթե վաղը գաք ու ասեք, որ մեր առաջարկություններն ընդունվել են, բնականաբար,  երկրորդ ընթերցմամբ կողմ կքվեարկենք», - նախքան քվեարկությունը՝ հայտարարեց «Ելք» դաշինքի անդամ Էդմոն Մարուքյանը:

«Հայաստանի Հանրապետության կառավարության կառուցվածքի մասին» օրենքում փոփոխություն կատարելու մասին նախագիծը նպատակ ունի ՀՀ կառավարության կառուցվածքը համապատասխանեցնել 2015 թվականի դեկտեմբերի 6-ին ընդունված Սահմանադրության փոփոխություններին՝ համաձայն որի, նախարարների թիվը պետք է լինի տասնութը: Տվյալ դեպքում խոսքը գնում է  կառավարության աշխատակազմի ղեկավար-նախարարի պաշտոնը կրճատելու մասին: Փոփոխությունների արդյունքում «ՀՀ կառավարության աշխատակազմի ղեկավար-նախարար» քաղաքական պաշտոնը փոխարինվում է «ՀՀ կառավարության աշխատակազմի ղեկավար» հայեցողական պաշտոնով՝ համապատասխանաբար փոփոխելով նաև նրա տեղակալների պաշտոնների անվանումները:

Բացի այդ, նախագիծը նպատակաուղղված է կառավարման արդյունավետությունը բարձրացնելու և կառավարման ձևը կիսանախագահականից խորհրդարանականի անցման գործընթացը սահուն անցկացնելու համար:

Հիմնական զեկուցող արդարադատության նախարարի առաջին տեղակալ Արթուր Հովհաննիսյանը նախագծի քննարկմանն ասաց, որ այս փոփոխությանը համահունչ փոփոխություններ են կատարվել «Պետական պաշտոններ զբաղեցող անձանց վարձատրության մասին» օրենքում, «Հանրային ծառայության մասին» օրենքում:

«Ազգային ժողովի պետաիրավական և մարդու իրավունքների պաշտպանության հարցերի մշտական հանձնաժողովում արվել էր առաջարկություն, որն ընդունվել և ներառվել է նախագծում:  Խոսքը վերաբերում է նրան, որ աշխատավարձի այն գործակիցը, որը պահպանվում է  «աշխատակազմի ղեկավար»   հայեցողական պաշտոնի համար, նույն գործակիցն ունենա նաև օրենսդիր մարմնի աշխատակազմի ղեկավարը, և նրա գործակիցը համապատասխանեցվի կառավարության աշխատակազմի ղեկավարի գործակցին: Սա գլխադասային հանձնաժողովում արված առաջարկություն էր, և նախագիծը գլխադասային հանձնաժողովում այս առաջարկությամբ է քվեարկվել և ներկայացվել»,- նշեց նա:

Ա. Հովհաննիսյանը նաև նշեց, որ նախագծերի փաթեթում  «Պետական պաշտոններ զբաղեցնող անձանց վարձատրության մասին»  օրենքի նախագիծը քննարկվել է  առողջապահության և սոցիալական հարցերի մշտական հանձնաժողովում, մի շարք առաջարկներ ևս արվել են:

«Հաշվի առնելով, որ Ազգային ժողովի աշխատակազմի ղեկավարի աշխատավարձի գործակիցը բարձրացվում է, առաջարկվել է նաև համապատասխանաբար բարձրացնել նրա առաջին տեղակալի, տեղակալի, խորհրդականի և օգնականի դրույքաչափերը: Առաջարկն ընդունելի է, ուղղակի մենք այդ առաջարկին կարող ենք անդրադառնալ առաջինից երկրորդ ընթերցման ժամանակ»,- ասաց հիմնական զեկուցող Ա. Հովհաննիսյանը:

ԱԺ արտահերթ նիստը շարունակվի վաղը: