Ձեր վստահելի աղբյուրը

Համատիրությունների հետ կապված բողոքներ ստացանք, երբ դեռ էլէներգիան նոր էր թանկացել. պարզվեց Կենտրոն համայնքում ամսավարձերը այդ առթիվ ավելացել էին։ Թվում է, թե այդպես էլ պիտի լիներ՝ բազմաբնակարանը վերելակ ունի, ինչը կարող էր բերել ամսավարձի ավելացման։ Բայց անտրամաբանական էր այն, որ ոչ թե վերելակի ծախսած էլէներգիայի գումարի հաշվով էր ավելացել, այլ՝ բնակարանների քառակուսի մետրերի հաշվով։

Հիշեցնենք, որ ՀՀ քաղաքացիները իրենց սեփականությունների քառակուսի մետրերի հարկն արդեն իսկ վճարում են, իսկ համատիրությունների համար ներբնակարային հարցերի լուծում չի էլ նախատեսված։ 

Այստեղից էլ թելը ձգվեց՝  թե որքան է ծախսում բազմաբնակարանի վերելակը էլէներգիա՝  բնակիչների համար մութ է։ Ու թեև քաղաքապետարանից մեր հարցմանը պատասխանեցին, իբր յուրաքանչյուր քաղաքացի կարող է հետևել վերելակի ծախսին, այնուամենայնիվ արձանագրենք, որ դա ամենևին այդպես չէ։  Նույնիսկ նորակառույց շենքերում մուտքերի ու վերելակների հոսանքի ծախսը  իրավունք կունենա ստուգել համատիրության կողմից լիազորված անձը: 

Ընդհանրապես՝ քաղաքապետարանին նամակ գրելը անշնորհակալ գործ է՝ մի նամակ գրում եք, լավագույն դեպքում մի նամակ ստանում եք՝ բայց «պատասխանավրեպ»։ Օրինակ՝ պատասխան նամակում գրված է՝ «սեփականատերերի համաձայնությամբ»։ Այնինչ՝ սեփականատերերի վզին փաթաթվում է «շահագործման համար վճարվելիք գումարները ներառվում են տվյալ տարվա բյուջեով նախատեսված 1քմ-ի հաշվարկը», ինչից էլ՝ բողոքները։

 «Երևանի քաղաքապետարանին ուղղված Ձեր հարցմանն ի պատասխան աշխատակազմի կոմունալ տնտեսության վարչությունից տեղեկացնում են, որ բնակարանի ընդհանուր մակերեսի հաշվարկով գումարը գանձվում է շենքի ընդհանուր բաժնային սեփականության պահպանման պարտադիր նորմերի շրջանակներում իրականացվող աշխատանքների համար։ Միաժամանակ, սեփականատերերի համաձայնությամբ վերելակների սպասարկման և շահագործման համար վճարվելիք գումարները ներառվում են տվյալ տարվա բյուջեով նախատեսված 1քմ-ի հաշվարկի մեջ։   Վերելակի  էլեկտրաէներգիայի ծախսը հաշվարկվում է  տեղադրված էլ.հաշվիչի ցուցմունքին  համապատասխան՝  հոսանքի  արժեքի  չափով: Հաշվիչները  տեղադրված են «Հայաստանի էլեկտրական ցանցեր» ՓԲԸ-ի կողմից բնակիչների համար տեսանելի վայրում և յուրաքանչյուր բնակիչ այն կարող է վերահսկել»։

Ընդհանուր պատասխան՝ ինչ բաժնային սեփականության մասին է խոսքը, ինչ պահպանման նորմեր ասենք նորակառույց շենքում, ինչու է քմ-ով հաշվարկվում, եթե համատիրությունները պնդում են, որ ներբնակարային որևէ հարց իրենց չի վերաբերում։ Չկա՞ն արդյոք չափորոշիչներ, որոնք բխում են կոնկրետ սպասարկման ծառայությունների ձևից՝ վերելակ, հավաքարար։ Է՞լ ինչ։ «Դամաֆոնների» հարցը համատիրություններին չի վերաբերում, ջրի-կոյուղու հարցը շենքից դուրս ու բնակարնից ներս՝ չի վերաբերում, բակերի մասով քաղաքապետարանն է գրում իր հաշվետվության մեջ...

Բնակիչները ընդամենը երկու բան են ուզում իմանալ՝ ինչի դիմաց են իրենք վճարում ու ուր են գնում այդ գումարները։  

Մի փոքր ուշադրություն համատիրությունների թեմայով՝ ու պարզվեց, որ ընդհանրապես բնակիչների համար անհայտ է մնում, թե ինչպես է որոշվում՝ որ ծառայությունն ինչ արժե, ինչքան գումար է հավաքվում, ինչպես են դրանք օգտագործվում։
Կառավարության ուշադրությունը հրավիրեցինք հարցին։ Անցած աշնանը մեզ պատասխանեցին, թե բազմաբնակարան շենքերի համատիրությունների օրենքի նախագիծը քննարկման փուլում է, մեր դիտարկումները հաշվի կառնվեն։

Վերջին նամակին  պատասխանը համարյա նույն բովանդակության էր.
«Ի պատասխան Ձեր` ՀՀ կառավարության աշխատակազմի 2017 թվականի մայիսի 18-ի թիվ 02/22.5/11769-17 գրությամբ ՀՀ արդարադատության նախարարություն վերահասցեագրված դիմումի՝ հայտնում ենք, որ բազմաբնակարան շենքերի կառավարման և համատիրությունների բնագավառում առկա խնդիրների կարգավորման նպատակով ՀՀ վարչապետի 2016 թվականի փետրվարի 5-ի №44-Ա որոշմամբ ստեղծված միջգերատեսչական աշխատանքային խմբի և ՀՀ արդարադատության նախարարության կողմից մշակված՝ «Բազմաբնակարան շենքի կառավարման մասին» ՀՀ օրենքում փոփոխութուններ կատարելու մասին  ՀՀ օրենքի նախագիծը ներկայացվել է ՀՀ կառավարություն: Ներկայումս նախագիծը գտնվում է ՀՀ ԿԱ քաղաքաշինության պետական կոմիտեի, ՀՀ տարածքային կառավարման և զարգացման նախարարության և Երևանի քաղաքապետարանի հետ համաձայնեցման և լրամշակման փուլում»։

Մեկուկես տարի համատիրությունների հետ կապված նոր օրենքը կերպար չի ընդունում, իսկ խնդիրը մնում է։

Ինչո՞վ օգնենք մի նորմալ օրենք գրվի, ասե՛ք։

Ա. Ո.