Ձեր վստահելի աղբյուրը

Թուրքական դատարանը քրդական «Ժողովուրդների դեմոկրատական կուսակցության» (HDP-ԺԴԿ) պատգամավոր, Դիարբեքիրի նախկին քաղաքապետ Օսման Բայդեմիրին ձերբակալելու որոշում է կայացրել:

«Էրմենիհաբեր»-ի փոխանցմամբ, Դիարբեքիրի դատարաններից մեկում Բայդեմիրի դեմ ընթացող դատավարության շրջանակներում քուրդ գործիչը մեղադրվում է քաղաքապետ եղած ժամանակ  ոստիկանների վիրավորանք հասցնելու մեջ: Որոշումը կայացվել է գործով 4-րդ դատական նիստի ժամանակ:

Աղբյուրը հիշեցնում է, որ հայամետ քուրդ քաղաքական գործիչը բազմիցս հանդես է եկել Հայոց ցեղասպանությունը ճանաչող ու դատապարտող հայտարարություններով: Վերջինս 2014-ին եկել է Հայաստան, այցելել Ծիծեռնակաբերդի հուշահամալիր, ծաղիկներ խոնարհել ու հարգել ցեղասպանության անմեղ զոհերի հիշատակը: Բայդեմիրի քաղաքապետ եղած ժամանակ է իրականացվել նաև Դիարբեքիրում գտնվող Սբ. Կիրակոս հայկական ավերված եկեղեցու վերականգնման ծրագիրը: Նախագծի ծախսերի մի զգալի մասն էլ իր վրա էր վերցրել քաղաքապետարանը:

Մերձավոր Արևելքի ամենամեծ հայկական եկեղեցին հանդիսացող Սբ. Կիրակոս եկեղեցին, սակայն, վերականգնվելուց մի քանի տարի անց՝ 2015-ին զգալի վնաս կրեց շրջանում տեղի ունեցած թուրք-քրդական բախումների հետևանքով: Ներկա դրությամբ փակված են բոլոր մուտքերը, որոնք տանում են այն թաղամաս, որտեղ գտնվում է եկեղեցին, ինչի պատճառով վնասի ճշգրիտ չափերը դեռևս հնարավոր չէ ճշտել: