Ձեր վստահելի աղբյուրը

Աստիճանաբար պետք է իրականացվի  համայնքների խոշորացումը և պետք է գնալ վարչատարածքային փոփոխությունների: Այս մասին հայտարարել է տարածքային կառավարման և զարգացման նախարարի պաշտոնակատար Դավիթ Լոքյանը Վարդենիսի տարածաշրջանի համայնքների ղեկավարների հետ հանդիպմանը:

«Առանձին-առանձին համայնքները չունեն հնարավորություններ և  ռեսուրսներ` ծրագրային գաղափար դնելու, բյուջե մեծացնելու և մնացած խնդիրները լուծելու համար: Մենք Հայաստանում ունենք մոտավորապես 400 համայնք, որոնց բյուջետային եկամուտները հնարավորություն չեն տալիս զարգանալու: Մեր երկրում պետք է բարեփոխումներ իրականացվի, սա պետական քաղաքականություն է, որի արդյունքում մենք պետք է գնանք վարչատարածքային փոփոխությունների»,-ասել է Դ. Լոքյանը: 

Նախարարության հասարակայնության հետ կապերի վարչության փոխանցմամբ, նա   համապարփակ տեղեկատվություն է ներկայացրել արդեն խոշորացված համայնքներում իրականացված և իրականացվող աշխատանքների մասին:

«Համայնքի բյուջեով  իրականացվել են ճանապարհաշինական աշխատանքներ, կառուցվել են ջրագծեր, մաքրվել սելավատարներ, անցկացվել է գիշերային լուսավորություն,  համայնքի համար գնվել է անհրաժեշտ տեխնիկա,  գնվել է սերմացու՝ բնակիչներին անվճար տրամադրելու նպատակով, ստեղծվել են աշխատատեղեր՝ ըստ անհրաժեշտության, և կրճատվել են այն աշխատողները, որոնք համայնքում որևէ գործառույթ չեն իրականացնում»,-նշել է Դավիթ Լոքյանը:

Նրա տեղեկացմամբ, ՀՀ ՏԿԶ նախարարությունը հատուկ ձեռնարկ է սահմանել, թե ինչ կարգով պետք է աշխատի խոշորացված համայնքի ղեկավարը: 

Հիշեցնենք, որ  ՀՀ  կառավարության  մայիսի 18- ին կայացած նիստում հաստատվել է համայնքների խոշորացման օրենքի նախագիծը, որը ներկայացվելու ՀՀ ԱԺ։ 

Ըստ այդմ՝ 361 համայնքների միավորման արդյունքում ձևավորվելու է 30 համայնք:

Սյունիքում խոշորացվող համայնքներն են՝ Կապանը, Քաջարանը և Սիսիանը,

Լոռիում՝ Ալավերդին, Ախթալան, Ստեփանավանը, Տաշիրը, Օձունը,

Կոտայքում՝ Բյուրեղավանը, Չարենցավանը, Եղվարդը, Ակունքը, Մեղրաձորը, Ջրվեժը, Քասախը:

Շիրակում հարակից համայնքների հաշվին խոշորացվելու են Անին, Ախուրյանը, Մարմարաշենը,

Արագածոտնի մարզում՝  Ապարանը, Ալագյազը, Արագածավանը, Ծաղկահովիտը,

Վայոց ձորի մարզում՝ Եղեգնաձորը, Արենիը, Եղեգիսը, Տավուշի մարզում՝ Իջևանը, Բերդը:

Գեղարքունիքում՝ Վարդենիսը, Մասրիկը , Ճամբարակը: