Ձեր վստահելի աղբյուրը

«Հայաստանի Հանրապետության կառավարության կառուցվածքի մասին» Հայաստանի Հանրապետության օրենքում փոփոխություն կատարելու մասին  նախագծում լրացումներ են արվել պատգամավորների առաջարկությունների հիման վրա:

Ներկայացնելով առաջին ընթերցմամբ ընդունված նախագիծը՝ հայտարարեց հիմնական զեկուցող արդարադատության նախարարի առաջին տեղակալ Արթուր Հովհաննիսյանը: Նա հիշեցրեց, որ երեկ առաջին ընթերցմամբ ընդունված նախագծով բարձրացվեց ԱԺ աշխատակազմի պաշտոնյայի դրույքաչափը՝ հավասարեցնելով կառավարության աշխատակազմի ղեկավարի դրույքաչափին:

«Առաջարկություն է հնչեցվել, որ դրան համապատասխան պետք է բարձրացվեն ԱԺ աշխատակազմի ղեկավարի առաջին տեղակալի, տեղակալի, խորհրդականի և օգնականի դրույքաչափերը»,-ասաց փոխնախարարը, ավելացնելով, որ փոփոխությունը կատարվել է:

«Ելք» խմբակցության կողմից արված առաջարկությունը, որը վերաբերում էր կառավարության կառուցվածքին, քննարկվել է, բայց չի ընդունվել ոչ ԱԺ հանձնաժողովի, ոչ էլ գործադիրի կողմից:

ԱԺ փոխնախագահ Արփինե Հովհաննիսյանը հայտնեց, որ նախագծին պետաիրավական ու մարդու իրավունքների մշտական հանձնաժողովը հավանություն է տվել: Նա նշեց, որ ապագայում էլ ԱԺ դահլիճում քննարկվելու են կառավարության կազմի, պետական պաշտոնների աստիճանակարգման վերաբերյալ հարցեր:

«Այնպես որ, կարծում եմ, այս դահլիճը ականատես կլինի ավելի առարկայական քննարկումների»,-ասաց նա:

ՀՀԿ-ական պատգամավոր Հրայր Թովմասյանը նշեց, որ չի բացառում հետագայում «Ելք»-ի արված առաջարկությունները կամ դրանց մի մասն ընդունվեն:

«Ես վստահ եմ, որ դեռ քննարկելու ենք այդ հարցերը»,-ասաց նա: