Ձեր վստահելի աղբյուրը

Ադրբեջանական պատվիրակներն անհանգստացած են Հայաստանի կողմից «Իսկանդեր» համակարգի ձեռք բերման հետ կապված: Լրագրողների հետ հանդիպմանն ասաց  ՀՀ ԱԺ պաշտպանության ու անվտանգության հարցերի մշտական հանձնաժողովի նախագահ Կորյուն Նահապետյանը:

«ՆԱՏՕ-ի խորհրդարանական վեհաժողովում ադրբեջանցի պատվիրակը հարց է բարձրացրել Հայաստանի կողմից «Իսկանդեր» համակարգի ձեռք բերման հետ կապված: Բավականին անհանգստացած են ադրբեջանցի պատվիրակներն, ինչը նկատելի էր հարց տալու ընթացքում»,- նշեց նա:

Կ. Նահապետյանի խոսքով, հայկական պատվիրակությունը պարզաբանել է, թե ինչպիսին է Հայաստանի պաշտպանական քաղաքականությունը, որոնք  են Հայաստանի  անվտանգության առաջնահերթությունները և հստակ նշվել է, որ այս համակարգի ձեռքբերումը նպատակ ունի վերականգնել ուժերի հավասարակշտությունը  Հարավային Կովկասում:

Նա նշեց, որ ադրբեջանական պատվիրակը խոսել է նաև Հայաստանի կողմից անվճար Ռուսաստանից զենք ձեռք բերելու մասին: 

«Մենք հակառակ պնդումն արեցինք, որ վերջին ժամանակահատվածում Ադրբեջանում միլիարդավոր դոլարներ է ծախսվում հարձակողական նշանակության  զենք ձեռք բերելու համար, չենք ողջունում սպառազինության մրցավազքը տարածաշրջանում, բայց մյուս կողմից մեր բոլոր գործողությունները նպատակաուղղված են լինելու մեր պաշտպանական կարողություններն ամրապնդելուն, տարածաշրջանում ռազմական հավասարակշռությունն ապահովելուն:

Նշվել է նաև, որ այսօր Ադրբեջանը դարձել է Եվրոպայում  սպառազինություններ ներկրող ամենախոշոր պետություններից մեկը և դա լրջագույն մարտահրավեր  ու սպառնալիք է ոչ միայն  տարածաշրջանային պետությունների, այլ ընդհանուր առմամբ միջազգային հանրության համար»,- ասաց Կ. Նահապետյանը: