ԵՄ բանագնացները հետաքրքրվել են «Ընտանեկան բռնության մասին» օրենքի նախագծի մասին

Իրավունք 18:09 01/06/2017 Հայաստան

ԱԺ նախագահի տեղակալ Արփինե Հովհաննիսյանը հունիսի 1-ին ընդունել է ԵՄ անդամ պետություններ Լատվիայի, Լիտվայի, Էստոնիայի, Սլովակիայի, Շվեդիայի և Նիդերլանդների արտաքին քաղաքական գերատեսչությունների՝ Արևելյան գործընկերության հարցերով հատուկ բանագնացներին՝ Եվրոպական միությունը նախագահող Սլովակիայի ԱԳՆ հատուկ բանագնաց, դեսպան Դուշան Դախոյի գլխավորությամբ:

ԱԺ հասարակայնության հետ կապերի վարչության հաղորդմամբ, Արփինե Հովհաննիսյանը կարևորել է Հայաստան-ԵՄ համագործակցությունը և Արևելյան գործընկերության շրջանակում մեր երկրում իրականացվող ծրագրերը: ՀՀ ԱԺ փոխնախագահը զրույցի ընթացքում անդրադարձել է հակակոռուպցիոն բնագավառում իրականացվող բարեփոխումներին:

Նա նշել է, որ առաջիկայում խորհրդարանում կքննարկվեն կոռուպցիայի կանխարգելման մարմնի ստեղծմանը և ազդարարների պաշտպանությանը վերաբերող օրինագծերը՝ շեշտելով դրանց կարևորությունը կոռուպցիայի դեմ պայքարում:

Անդրադառնալով խորհրդարանական ընտրություններին՝ զրուցակիցները կարևորել են ՀՀ ընտրական համակարգում իրականացված բարեփոխումները:

Հանդիպման ընթացքում Արփինե Հովհաննիսյանը հանգամանալից ներկայացրել է Դատական օրենսգրքի մշակման գործընթացը, դատավորների անկախության ապահովմանն ուղղված երաշխիքները: Բանագնացների խնդրանքով անդրադարձ է կատարվել նաև «Ընտանեկան բռնության մասին» օրենքի նախագծին:

Հանդիպման ավարտին երկուստեք կարևորվել է նոյեմբերին ՀՀ-ԵՄ համապարփակ և ընդլայնված գործընկերության համաձայնագրի ստորագրումը:

ԵՄ հատուկ բանագնացները բարձր են գնահատել Հայաստանում վերջին տասնութ ամիսներին արձանագրված առաջընթացը՝ համարելով այն լավ հենք ժողովրդավարության ամրապնդման և մարդու իրավունքների պաշտպանության զարգացման համար:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: