Ձեր վստահելի աղբյուրը

Տավուշի սահմանամերձ համայնքներում շինարարական ձեռնոցների արտադրությամբ զբաղվող «Տավուշ տեքստիլ» ընկերությունն ընդլայնում է արտադրության ծավալները և արտադրամասերը: Բերդ և Արծվաբերդ համայնքներում գտնվող ընկերության  արտադրամասերում կատարած շրջայցի ժամանակ լրագրողները զրուցեցին ընկերության գործադիր տնօրեն Միքայել Եզեկյանի հետ, ով նշեց, որ Բերդ համայնքում ընկերությունը ձեռք է բերել նախկին «Ռելեի գործարան»-ի տարածքը, որն ունի 5 շենք-շինություն:

«Հիմնական արտադրական մասնաշենքը կլինի եռահարկ շինությունը, յուրաքանչյուր հարկի մակերեսը կազմում է 1600քմ: 2018թ. մարտից նախատեսվում է կառուցել ևս մեկ արտադրական մասնաշենք՝ 2500 քմ ընդհանուր մակերեսով, որը նախատեսվում է ավարտին հասցնել 2020թ. հունիսին: Բերդի մասնաճյուղում իրականացվելու են ձեռնոցների արտադրության ամբողջական ցիկլը ներառող աշխատանքներ, մասնավորապես՝ գործում, եզրակարում և ծածկութապատում»,- Panorama.am-ի հետ զրույցում մանրամասնեց Եզեկյանը:

2017թ. հունիսի վերջին մասնակի կմեկնարկի արտադրական մասնաշենքի 3-րդ հարկի արտադրամասը, որտեղ կտեղադրվի 100-120 հաստոց և կստեղծվի 40 աշխատատեղ: Արտադրամասերն ամբողջ հզորությամբ աշխատելու ժամանակ նախատեսվում է աշխատակիցների ընդհանուր թիվը հասցնել 800-ի՝ ամսական 120 հազար դրամ միջին աշխատավարձով:

Միքայել Եզեկյանը հավելեց, որ ընկերությունն ընդլայնում է նաև Արծվաբերդ համայնքի արտադրամասի տարածքը, որի շինարարական աշխատանքներն արդեն մեկնարկել են: Նրա խոսքով՝ ընկերության արտադրանքի պահանջարկը մեծ է, քանի որ մեծ է նաև շուկան: Ընկերության արտադրանքը հիմնականում արտահանվում է Ռուսաստան և Ուկրաինա, սակայն մտածում են նաև ԱՄՆ և Եվրոպա արտահանում իրականացնելու մասին:

«Տավուշ տեքստիլ» ընկերության հիմնադիր Սուրեն Երիցյանն էլ լրագրողների հետ զրույցում մեծ հպարտությամբ ընդգծեց, որ սահմանամերձ համայնքներում ներդրումներ է կատարել ու դրա համար չի փոշմանել: Նա այլ անձանց ևս կոչ արեց առանց հապաղելու սահմանամերձ համայնքներում ներդրում կատարել՝ վստահեցնելով, որ պատերազմական վիճակը որևէ կերպ չի խանգարում ներդրում կատարելուն և շահույթ ստանալուն:

«Ես վաղուց էի ցանկանում Տավուշի մարզում ձեռնոցների արտադրություն հիմնել: Հետո տեսա, որ կա դրա լուծման բանալին, քայլ արեցի այդ ուղղությամբ և ստացվեց: Ես մի արտադրամաս ունեմ Չորաթան համայնքում, մեկը՝ Արծվաբերդում, երրորդը հիմնում ենք Բերդում: Մի փոքր արտադրամաս էլ ունենք Մովսես գյուղում: Անցած տարի մեր շրջանառությունը կազմել է 1 միլիարդ դրամից ավելի, իսկ այս տարի կլինի երկու միլիարդից ավելի»,- ընդգծեց նա:

Սուրեն Երիցյանը նշեց, որ իր արտադրությունն ազատված է շահութահարկից, ինչն էական նախապայման է բիզնեսի զարգացման համար:

Մեզ հետ զրույցում Սուրեն Երիցյանը նաև նշեց, որ ժամանակի ընթացքում, երբ իրենք տեղում կունենան պատրաստված մասնագետներ ու որակյալ աշխատուժ, կնախաձեռնեն աշխարհում ավելի մեծ պահանջարկ ունեցող և թանկարժեք ապրանքների արտադրություն: