Ձեր վստահելի աղբյուրը

Թյուր կարծիք կա, որ ԵԱՏՄ-ին անդամակցելով՝ Հայաստանը մաքսային և հարկային քաղաքականությունների վարման առումով, հնարավոր է, կորցնի իր սուվերենությունը: Սակայն եթե վերցնելու լինենք ԵՄ-ն և ԵԱՏՄ, ապա թե ԵՄ-ի, և թե ԵԱՏՄ-ի համագործակցությունների առումով գոյություն ունի հարկային և մաքսային քաղաքականությունների միասնականեցման և ներդաշնակեցման քաղաքականություն: Լրագրողների հետ այսօր կայացած հանդիպման ժամանակ այս մասին ասաց ՀՀ ֆինանսների նախարարի տեղակալ Դավիթ Անանյանը:

Նրա խոսքով,  միասնականացման քաղաքականության դեպքում այս կամ այն կառույցին անդամակցող երկրները փորձում են ձևավորել միասնական օրենսդրություն:

«ԵԱՏՄ-ի մասով միասնականեցման օրինակ է մաքսային օրենսգիրքը, որը գործածության մեջ է մտնելու 2018 թվականի հունվարի 1-ից: Իսկ ահա ներդաշնակեցման քաղաքականությունը միասնականեցման քաղաքականությունից տարբերվում է նրանով, որ երկրները, պահպանելով իրենց հարկային և մաքսային անկախությունը, այնուամենայնիվ համագործակից  երկրների հետ փորձում են կառուցել համագործակցային փոխհարաբերություններ»,- նշեց նախարարի տեղակալը:

Ասուլիսին ներկա Եվրասիական տնտեսական հանձնաժողովի ֆինանսական քաղաքականության դեպարտամենտի տնօրեն Տիգրան Դավթյանն իր հերթին նկատեց, որ ԵԱՏՄ պայմանագրի հիմնական դրույթի նպատակն է անդամ երկրների միջև կապիտալի, աշխատուժի և ապրանքների ազատ տեղաշարժ ապահովել:

«Մեր նպատակը չէ ապահովել երկրների սուվերենությունը, մեր նպատակը չէ բոլոր երկրների տնտեսությունները բերել մեկ հարթության վրա: Մեր նպատակն է ներդաշնակեցնել ֆինանսական շուկաները և հարկային քաղաքականությունները: Մեր հիմնական նպատակն է հեշտացնել տնտեսվարող սուբյեկտների աշխատանքը»,- ասաց նա:

Պաշտոնյայի խոսքով, իրենք մշտական մոնիթորինգի տակ են պահում երկրների կողմից վարվող քաղաքականությունները և եթե ի հայտ են գալիս ինչ-ինչ խնդիրներ, դիմում են անդամ երկրներին՝ վերացնելու դրանք:

«Մեր այսօրվա ամենակարևոր խնդիրներից մեկը անդամ երկրների վարչական մարմինների տեղեկատվության փոխանակումն է: Կարևոր խնդիր է նաև մեկ պատուհանի գործընթացի ներմուծումը: Դրա վերջնական նպատակն այն է, որ մաքսային սահմանները հատելու ժամանակ մարդիկ անցնեն մեկ պատուհանի սկզբունքով: Տնտեսվարող սուբյեկտը, երբ գա մաքսային սահման, նրա տվյալները վաղուց այնտեղ կունենան: Այս պարագայում սահմանը հատելը կտևի րոպեներ: Հուսով ենք, որ 2 տարի անց հնարավոր կլինի բոլոր գործընթացների թվայնացումը բերել վերջնական տեսքի»,- նշեց Տիգրան Դավթյանը:

Բանախոսն անդրադարձավ նաև միասնական արժույթի գաղափարախոսությանը՝ նկատելով, որ այն բերելու է միասնական դրամավարկային քաղաքականության վարման:

«Բայց մենք դրան պատրաստ չենք: Թե երբ պատրատ կլինենք, դժվար է ասել: Ամեն երկիր դողում է իր սուվերենության վրա և 2025 թվականից հետո անգամ, դժվար թե, այդ մասին խոսակցություն լինի»,- ամփոփեց Դավթյանը: