Ձեր վստահելի աղբյուրը

Ազգային ժողովի արտահերթ նիստում քննարկվում է կառավարության կողմից ներկայացված «Պետական գույքի մասնավորեցման 2017-2020 թվականների ծրագրի մասին օրենքի նախագիծն առաջին ընթերցմամբ ընդունելու մասին հարցը:

Հիմնական զեկուցող ՀՀ կառավարությանն առընթեր պետական գույքի կառավարման վարչության պետ Արման Սահակյանն ասաց, որ ներկայումս գործողության մեջ է  պետական գույքի մասնավորեցման 2006-07 թվականների ծրագրերի մասին ՀՀ օրենքը:

«Նախորդ ծրագրերի ցանկում ընդգրկված, սակայն չմասնավորեցված  ընկերությունները, փոքր օբյեկտները նոր ծրագրի մասն են վերջինիս  ուժի մեջ մտնելու պահից: Ծրագրի մաս է կազմում նաև նախորդ ծրագրում ընդգրկված չմասնավորեցված պետական բաժնեմաս  ունեցող ընկերությունների, օբյեկտների և մասնավորեցման նոր առաջարկվող պետական բաժնեմաս ունեցող ընկերությունների ցանկը՝ ընդամենը 12 հանրապետական գործադիր մարմինների և մարզպետարանի  ենթակայության պատկանող թվով 47  ընկերություն»,- նշեց Ա. Սահակյանը:

Նրա ներկայացմամբ, նախորդ ծրագրում ընդգրկված չմասնավորեցված ընկերություններն են 5 հանրապետական  գործադիր մարմինների  ենթակայությանը պատկանող թվով 22  պետական  մասնակցությամբ ընկերություններ, 1 անշարժ գույք:

Ա. Սահակյանն ասաց, որ մասնավորեցման նոր առաջարկվող ընկերությունները ծրագրում ընդգրկելու համար  հիմք են հանդիսացել մի շարք գերատեսչությունների կողմից ներկայացված առաջարկություններ, հիմնավորումներ: Ծրագրում ընդգրկվել է 11 հանրապետական գործադիր մարմինների և մարզպետարանի ենթակայությանը պատկանող նոր առաջարկվող թվով 24 ընկերություն:

«Պետական գույքի կառավարման ոլորտում համապատասխան բարեփոխումների իրականացման, պետական մասնակցությամբ  առևտրային կազմակերպությունների գործունեության արդյունավետության բարձրացման, պետական բյուջեի մուտքերն ավելացնելու և սոցիալական խնդիրներ լուծելու նպատակով առաջարկվում է  ընդունել 2017-20 թթ. ծրագիրը»,-  նշեց ՀՀ կառավարությանն առընթեր պետական գույքի կառավարման վարչության պետը:

Նշենք, որ ծրագրով, մասնավորապես, մասնավորեցման առաջարկվում են առողջապահության ոլորտի մի շարք ընկերություններ, որոնց մասնավորեցումն առաջարկվում է իրականացնել համապատասխանեցնելով ՀՀ կառավարուրության ծրագրին և առողջապահության ոլորտում ներկայումս իրականացվող քաղաքականության պահանջներին` հաշվի առնելով ընկերությունների գործունեության առանձնահատկությունները: