Ձեր վստահելի աղբյուրը

«Շատ կարևոր հարց է, նույնիսկ համաձայն եմ, որ կարող է լինել ճակատագրական, բայց հիմա ունենք խնդիր»,- Ազգային ժողովի արտահերթ նիստում  «ՀՀ վարչատարածքային բաժանման մասին», «Տեղական ինքնակառավարման մասին» օրենքներում փոփոխություններ և լրացումներ կատարելու մասին օրենքների նախագծերի քննարկման ժամանակ հայտարարեց «Ելք»  կուսակցությունների դաշինք խմբակցության ղեկավար Նիկալ Փաշինյանը:

Նրա խոսքով, կառավարությունն իրենց չի ներկայացնում այն անհրաժեշտ ելակետային տվայլները, որոնց հիման վրա պետք է համոզմունք ձևավորել՝ ճիշտ որոշում է սա, թե ոչ:

«Ո՞րը կարող էր լինել ելակետային  տվյալը: Երբ որ ունենայինք շոշափելի, որոշակի պարամետրերին  համապատասխանող վերլուծություն ամենաառաջին երեք խոշարացված համայքներում տեղի ունեցող պրոցեսների վերաբերյալ: Քանի դեռ չունենք այս վերլուծությունը,  ուղղակի քվեարկել առանց համոզված լինելու, թե ինչ արդյունքների է  բերելու, կարծում ենք՝ ճիշտ չէ: Այս առումով այս քվեարկությանը մենք չենք մասնակցի, և առաջիկայում «Ելք»-ը կձեռնարկի իր սեփական նախաձեռնությունը, և մենք կլինեն այդ համայքներում, սեփական ուսումնասիրությունը կանենք»,- ասաց ընդդիմադիր գործիչը:

«Ծառուկյան» կուսակցությունների դաշինքի անդամ, ԱԺ փոխնախագահ Միքայել Մելքումյանն ասաց, որ իրենց մոտեցումը հստակ է՝ դեմ են այս միջոցառմանը, գտնում են, որ ժամանակավրեպ է:

«Այս պահին մեր պետությունը պատրաստ չէ  իր բոլոր ռեսուրսներով, տեղական ինքնակառավարման համակարգի մոբիլիզացիոն կարողություններով և հմտություններով, նաև տեղական բյուջեների  կառավարման առանձնահատկությունները հաշվի առնելով, անհնար ենք  համարում, որ դա առաջիկայում  կունենա հաջողություն: «Ծառուկյան» դաշինքը միանշանակ դեմ է քվեարկելու»,- ասաց Մ. Մելքումյանը:

ՀՀԿ խմբակցության ղեկավար Վահրամ Բաղդասարյանն ասաց, որ բավականին հանրային հնչեղություն ունեցող հարց է:

«Փարատում եմ մեր որոշ գործընկերների այն բոլոր մտքերը, որ սրանք ինչ-որ մի տեղ մի քարտեզ է գծվել: Այստեղ որևէ անհատական շահագրգռվածություն մենք ի նկատի չենք ունեցել: Քննարկումները եղել են բավականին ծավալուն, քննարկումների  ընթացքում  առաջարկվել է այս տարբերակը»,- նշեց նա:

Վ. Բաղդասարյանի խոսքով, արդեն կան այն ծրագրերը, որոնք այս խոշորացումների դեպքում պետք է կոմպենսացնեն ներդրումները, որ խոշորացման արդյունքը զգալի և տեսանելի լինի հանրության վրա: