Ձեր վստահելի աղբյուրը

Տասն օր շարունակ ամառային օրերն էլ ավելի գունավոր կդարձնի հայաստանյան ամենաերիտասարդական փառատոնը՝ «Արտֆեստ»-ը:

Հունիսի 8-19-ը փառատոնի շրջանակում կլինեն թատերական ներկայացումներ, կինոդիտումներ, նորաձևության ցուցադրություն, ցուցահանդեսներ,  համերգներ, գրական ընթերցումներ, վարպետության դասեր, հանդիպումներ արվեստի գործիչների հետ:

Փառատոնի բացումն այսօր է՝ ժամը 18-ին  Երևանի թատրոնի և կինոյի պետական ինստիտուտի ուսանողական թատրոնում՝ «Վեստսայդյան պատմություն» պարային ներկայացմամբ:

Կազմակերպիչներն այսօր լրագրողների հետ հանդիպմանը նշեցեին, որ 2013-ից անցկացվող փառատոնին այս տարի մասնակցում է 500 երիտասարդ: Մասնակիցների թիվը գնալով ավելանում է՝ 2013-ին  փառատոնին մասնակցում էր 130 երիտասարդ, 2014-ին՝ 200, 2015-ին՝ 350: 2016-ից փառատոնը դարձավ միջազգային մասնակիցների աշխարահգրությունն ընդլայնվեց, մասնակիցների թիվն էլ դարձավ 430՝ Շվեդիայից,  Չեխիայից, Ֆրանսիայից, ԱՄՆ-ից և ՌԴ-ից, Չեխիայից, Վրաստանից և այլ երկրներից:

Փառատոնը հայաստանյան  մշակությում բացառիկ է, քանի որ ընդգրկում է արվեստի տասը ճյուղեր միաժամանակ:

Այս տարի փառատոնի մշակութային ուղղություններին (կինո, թատրոն, երգարվեստ, կերպարվեստ, դեկորատիվ-կիրառական արվեստ, հագուստի մոդելավորում) ավելացել է ևս մեկը. երիտասարդ ստեղծագործողներն իրենց ուժերը կարող են փորձել նաև գրականության մեջ (մասնավորապես՝ դրամատուրգիա և կինոսցենար):

Փառատոնի կազմակերպիչները որոշել են այս տարի մրցույթը նվիրել արձակագիր, սցենարիստ Ռուբեն Հովսեփյանի հիշատակին:
Ընդառաջ գնալով այդ որոշմանը՝ Ռուբեն Հովսեփյանի ընտանիքն էլ դրամական պարգև է նախատեսել այն 2 մասնակիցների համար, որոնց աշխատանքները լավագույնը կճանաչվեն «Դրամատուրգիա» և «Կինոսցենար» անվանակարգերում: Մրցանակակիրները կստանան 100.000-ական ՀՀ դրամի չափով պարգև:
«Դրամական մրցանակ սահմանելու գաղափարը մայրիկինս էր: Թեպետ այն շատ մեծ չէ, բայց կարծում ենք, որ երիտասարդ մարդու համար դա ոգևորիչ կլինի: Ինչ-որ առումով մեր ընտանիքը փորձում է աջակցել այս ոլորտում նոր ճանապարհ հարթող երիտասարդներին»,- ասել  է Ռուբեն Հովսեփյանի դուստրը՝ Մոնի Հովսեփյանը: