Ձեր վստահելի աղբյուրը

«Ինձ մոտ տպավորություն է, որ նոյեմբերի 5-ի ՏԻմ ընտրություններից առաջ դուք ունեք մոտավոր թեկնածուներ, և դրա հիման վրա ձևում եք համայնքների տվյալ փունջը»,-ԱԺ-ում նման մտահոգություն հայտնեց «Ծառուկյան» դաշինքի խմբակցության անդամ Նաիրա Զոհրաբյանը՝ անդրադառնլով համայնքների խոշորացման վերաբերյալ օրինագծին:

Նա ասաց, չի կարողանում գտնել այն տրամաբանությունը, որով այդ փնջից համայնք է հանվում կամ ընդգրկվում: Համոզմունք հայտնեց, որ Գեղարքունիքում խոշորացումն իրականացվելու է այնպես, ինչպես առաջարկում են, քաղաքական որոշում կա: Առաջարկեց հանդիպել խոշորացվող համայնքների բնակիչներին, ասաց, նրանք կարող են ճիշտ տրամաբանություն ներկայացնել:

«Մի խուսափեք այդ մարդկանց հանդիպելուց, քանի որ մենք որևէ տրամաբանություն չենք տեսնում օպտիմալ կառավարման»,-ասաց նա:

«Ելք» խմբակցությունից Մանե Թանդիլյանն էլ ասաց, որ նախագծում փոփոխություններ են իրականացվել. «Շարունակում եմ կարծել, որ ԱԺ-ն չունի հստակ տվյալներ, թե ինչքանով է արդյունավետ խոշորացումը: Չկան տվյալներ, թե ինչ ստացան խոշորացված համայնքները բնակիչները: Այդ պատճառով արտահերթ նիստով բերել նման նախագծերը, համարում եմ անընդունելի»։

Նույն խմբակցությունից Էդմոն Մարուքյանն ասաց, որ ժամանակին աջակցել է խոշորացման ծրագրին, սակայն դրական արդյունքներ չի տեսել:

«Կոնկրետ Լոռու մարզի խոշորացված համայնքներում որևէ դրական տեղաշարժ չկա: Քարոզարշավի ժամանակ, բոլորը դժգոհել են, հիմա էլ կառավարությունը ռեալ հաջողության արդյունքներ չի ներկայացնում»,-ասաց նա, ավելացնելով, որ լավ գաղափարը փչացվել է, ինչի հետևանքով հիմա չեն կարող աջակցել դրան:

Ի պատասխան տարածքային կառավարման փոխնախարար Վաչե Տերտերյանը հայտարարեց, որ բոլոր խոշորացված համայնքներում հաջողության պատմություններ ունեն. «Ես կխնդրեմ հաջորդ համայնքներում լինելուց մի քիչ ավելի ուշադիր լինել: Եթե ցանկանաք, կարող եք հաջողության պատմություններ շատ տեսնել»:

Ինչ վերաբերում է Զոհրաբյանի առաջարկությանը, ասաց, Գեղարքունիքի գրեթե բոլոր համայնքներում եղել ենք, հանդիպել ենք ավելի քան մի քանի տասնյակ բնակիչների հետ, լսել նրանց առաջարկությունները: