Ձեր վստահելի աղբյուրը

Անկախ նրանից, որ Իրաքյան Քուրդիստանի իշխանությունները որոշել են այս տարվա սեպտեմբերի 25-ին անկախության հանրաքվե անցկացնել, դա դեռ չի նշանակում, որ այդ հանրաքվեն անցկացվելու է։ Պետք է հաշվի առնել նախկին փորձը, երբ Քուրդիստանի ինքնավար հատվածի իշխանությունները 3 տարի առաջ ևս հայտարարել էին հանրաքվե անցկացնելու մտադրության մասին, սակայն այդպես էլ հանրաքվե չկայացավ։ Panorama.am-ի թղթակցի հետ զրույցում այս մասին հիշեցրեց թուրքագետ ՄԱՀՀԻ փորձագետ Հայկ Գաբրիելյանը։

«Իսկ հանրաքվե տեղի չունեցավ, քանի որ ԱՄՆ և տարածաշրջանային շատ երկրներ դեմ էին դրան։ Ինչ վերաբերում է Թուրքիայի դիրքորոշմանը, ապա որքան էլ այդ երկրի իշխանություններ լավ հարաբերությունների մեջ են ինքնավարության իշխանությունների հետ, դեռ չի նշանակում, որ կողմ պետք է լինի Իրաքյան Քուրդիստանի անկախության հանրաքվեին։

Եթե Իրաքի քրդերն անկախություն ստանա, դա կարող է ոգևորել Սիրիայի և Իրանի քրդերին։ Իսկ միասնական Քուրդիստանը Թուրքիային շատ է վախեցնում»,- նկատեց  Հայկ Գաբրիելյանը՝ համոզմունք հայտնելով, որ Իրաքյան Քուրդիաստանն, անկասկած, մի օր կստեղծվի, միայն ժամանակ է հարկավոր։

Թուրքագետը նաև նկատեց՝ եթե անգամ Իրաքյան Քուրդիստանն անկախանա, միևնույն է, տնտեսական կախվածության մեջ կմնա Թուրքիայից։

Հիշեցնենք, որ Թուրքիայի ԱԳՆ-ն արդեն իսկ արձագանքել է Իրաքի Քուրդիստանի ինքնավար հատվածի իշխանությունների՝ անկախության հանրաքվեի անցկացման որոշմանը։
Գերատեսչության տարածած հաղորդագրության մեջ, մասնավորապես, նշվել է, որ անկախության հարցով հանրաքվե անցկացնելը սարսափելի սխալ է։