Ձեր վստահելի աղբյուրը

«Սեյվ դը չիլդրեն» կազմակերպության հայաստանյան գրասենյակը այսօր ներկայացրեց Հայաստանում նախադպրոցական կրթության մատչելիության հետազոտության արդյունքները, որն իրականացվել է «Նախաձեռնություն հանուն երեխայի առողջության և կրթության» ծրագրի շրջանակներում։

«Սեյվ դը չիլդրեն» կազմակերպության կրթության և երիտասարդության հարցերով փորձագետ Իռեն Սարգսյանը տեղեկացրեց, որ հանրցումներ են անցկացվել 2016 թվականի նոյեմբեր-դեկտեմբեր ամիսներին՝ հանրապետության 600  տնային տնտեսություններում, որոնք ունեն 3-5 տարեկան երեխաներ։

«Հարցվողների 80 տոկոսը համարել են, որ նախադպրոցական կրթությունը շատ կարևոր է, իսկ 62 տոկոսը դրական են համարել դրա պարտադիր դառնալը։ Պետք է ձեռնարկվեն որոշիչ քայլեր թե նախադպրոցական հաստատությունների քանակն ավելացնելու, թե դրանց ծառայությունների որակն բերալավելու ուղղությամբ»,-նշեց նա։

Փորձագետը ուշադրություն հրավիրեց զեկույցում առկա են մտահոգիչ տվյալներ վրա, թե որոնք են նախադպրոցական կրթությունից հիմանականում դուրս մնացող երեխաները։

«Նախադպրոցական կրթական համակարգում չընդգրկված առավել խոցելի խմբերի երեխաների մեջ են մտնում հաշմանդամություն ունեցողները, փախստականների և տեղահանված ընտանիքների երեխաները, ինչպես նաև սոցիալապես անապահով ընտանիքների երեխաները։ Գյուղական համայնքներում հարցվածների 92.6, իսկ քաղաքային համայնքներում 87.3  տոկոսը պատասխանել են, որ իրենց մանկապարտեզներում հաշմանադամություն ունեցող երեխաներ չկան։ Այս անջրպետը վերացնելու և կրթության առանձնահատուկ պայմանների կարիք ունեցող երեխաների ներգրավվածությունը նախադպրոցական հաստատություններում մեծացնելու նպատակով կարևորվում է ներառական ծառայությունների ներդրումը պետական կրթական քաղաքականության մեջ»,-ասաց Իռեն Սարգսյանը։

Հանդիպմանը ներկա ՀՀ աշխատանքի և սոցիալական հարցերի նախարար Արտեմ Ասատրյանը կարևորելով այս նախաձեռնությունը, նշեց, որ նախարարությունը ևս ուսումնասիրություններ է արել, կարիքների գնահատում կատարել, թե ինչու են երեխաները դուրս մնում նախադպրոցական կրթությունից։

«Պետական բյուջեյում ներառված կոնկրետ ծրագրեր ունենք այսօր, որով սովորական մանկապարտեզներում ծրագիր ենք ընդգրկել՝ հատուկ մասնագետներին վարձատրություն տրամադրելու համար։ Այն թույլ է տվել ծնողներին հատուկ կարիք ունեցող երեխաներին մանկապարտեզ տանել, ոչ թե ինչ-որ հատուկ սոցիալական հաստատություն»,- ասաց նախարարը՝ հավելելով, որ այս հարցի շուրք քննարկում են ունեցել նաև ԱԺ նախագահ Արա Բաբլոյանի հետ։

ՀՀ ԿԳՆ հանրակրթության վարչության նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանի խոսքով՝ կառավարության և ԿԳՆ օրակարգում է նախադպրոցական կրթության զարգացման տեսլականը, զարգացման ուղղությունները մշակելը. «Շատ կարևորում եմ այս առումով հետազոտությունը, քանի որ այն բավականին համապարփակ է, բազմակողմանի է և հնարավորություն կտա բացթողումները և սխալները նայելու, քննարկելու և ճիշտ որոշումներ կայացնելու հետագա զարգացումների համար»։

«Սեյվ դը չիլդրեն» կազմակերպության ներկայացուցիչները նշեցին, որ հիմնվելով հետազոտության քանակական և որակական տվյալների վրա՝ մշակվել և պետական պատկան մարմիններին են ներկայացվել մի շարք առաջարկությւոններ, որոնք կնպաստեն Հայաստանում նախադպրոցական կրթության ծառայությունների բարելավմանը և դրանք հասանելի կդարձնեն առավել խոցելի խմբերի երեխաների համար։

Առաջին քայլով առաջարկվում է նախադպրոցական կրթությունը պարտադիր դարձնել 5-6 տարեկան երեխաների համար՝ դա ներառելով 2016-2025 թթ. Կրթության զարգացման պետական ծրագրում։