Ձեր վստահելի աղբյուրը

Պակիստանը Թուրքիայի օրինակով զորախումբ է ուղարկելու Քաթար: tengrinews.kz-ն, հղում անելով yenicag.ru-ին, գրում է, որ 20 հազար զինծառայող ուղարկելու որոշումն ընդունվել է Պակիստանի և Թուրքիայի միջև ռազմական համագործակցության համաձայնագրերի շրջանակում:

Ավելի վաղ Քաթարի պատվիրակությունը պաշտոնական այցով ժամանել է Իսլամաբադ: Այցի նպատակը Պարսից ծոցում իրավիճակի սրման քննարկումն է:

Մինչև Պակիստան այցը քաթարյան դիվանագետները գնացել են Լահոր և հանդիպել Փենջաբ նահանգի գլխավոր նախարարին, նրան փոխանցել Քաթարի էմիրի ուղերձն այն մասին, որ Պակիստանը պետք է կարևոր դեր խաղա Պարսից ծոցում դիվանագիտական ճգնաժամը հաղթահարելու գործում:

Նախօրեին Թուրքիայի նախագահ Էրդողանը հավանություն էր տվել օրինագծին, որը թույլ է տալիս թուրք զինծառայողներ տեղակայել Քաթարում գտնվող ռազմաբազայում և համագործակցել այդ երկրի ժանդարմերիային ուսուցանելու համար: Ենթադրվում է, որ երկրները համատեղ զորավարժություն կանցկացնեն:

Հունիսի 5-ից Պարսից ծոցի մի շարք երկրներ, այդ թվում Սաուդյան Արաբիան, Եգիպտոսը, Արաբական Միացյալ Էմիրություններն ու Բահրեյնը, խզել են դիվանագիտական կապերը Քաթարի հետ: Պատճառը, ինչպես պնդում են այդ գործընթացի նախաձեռնողները, Դոհան ֆինանսավորում է համաշխարհային ահաբեկչությունը, նաև Մերձավոր Արևելքում իրավիճակն ապակայունացնելու փորձ է անում:
Պակիստանի ԱԳՆ ներկայացուցիչը հայտնել է, որ երկիրը Քաթարի հետ դիվանագիտական հարաբերությունները խզելու մտադրություն դեռևս չունի, բայց եթե ինչ-որ փոփոխություններ լինեն, գերատեսչությունն անհապաղ կհրապարակի պաշտոնական հայտարարություն: