Ձեր վստահելի աղբյուրը

Երևանի ավագանու հանդիսավոր նիստում րոպեներ առաջ տեղի ունեցավ Տարոն Մարգարյանի երդման արարողությանը: Նիստին մասնակցում էին ՀՀ նախագահը, Ամենայն Հայոց Կաթողիկոսը, ԱԺ նախագահը, վարչապետը, Երևանի նախկին քաղաքապետերից Երվանդ Զախարյանը, հասարակական, քաղաքական, մշակութային գործիչներ:

Համաձայն Երևանի ավագանու կանոնակարգի` նիստը վարում էր ավագանու ավագ անդամ Աստղիկ Գևորգյանը:

Երևանի նորընտիր քաղաքապետ Տարոն Մարգարյանը երդվեց քաղաքապետի լիազորությունները իրականացնելու ընթացքում պահպանել Հայաստանի Հանրապետության Սահմանադրությունը, օրենքները, Երևանի ավագանու որոշումները, ազնվորեն և բարեխղճորեն կատարել Երևանի քաղաքապետի լիազորությունները, ծառայել Երևանի բարգավաճմանը, գործել ի բարօրություն նրա բնակիչներին:

«Պարտավորվում եմ հոգ տանել մեր հնագույն մայրաքաղաքի փառքի պահպանման և բազմապատկման համար, պաշտպանել համայնքի իրավունքները, օրինական շահերը և սեփականությունը, ուժերիս անմնացորդ նվիրումով սատարել ժողովրդի հավատին, նպաստել նրա նյութական և հոգևոր վերելքին: Աջակից լինել ամեն մի ազնիվ նախաձեռնության, որ միտված կլինի իմ համաքաղաքացիների նվիրական գաղափարների իրականացմանը»,- խոստացավ Տարոն Մարգարյանը:

Նա երդման տեքստն արտասանեց ձեռքը «Երևանում տեղական ինքնակառավարման մասին» օրենքին դրած: Երդվելուց հետո Երևանի քաղաքապետի խորհրդանիշ հանդիսացող լանջաշղթան՝ հայոց տասներկու մայրաքաղաքների անվանատառերով, հանձնվեց նորընտիր քաղաքապետ Տարոն Մարգարյանին:

Համաձայն Երևանի ավագանու կանոնակարգի՝ Երևանի քաղաքապետի երդման ստորագրված տեքստն ի պահ հանձնվեց Երևան քաղաքի պատմության թանգարանին:

Նշենք, որ ավագանու նիստին չէր մասնակցում «Երկիր Ծիրանի» կուսակցությունը: