Ձեր վստահելի աղբյուրը

«Համայնքների խոշորացման նպատակը պետք է լինի բնակիչների հոգսերի թեթևացումը, իշխանության ապակենտրոնացումը»,-այսօր կայացած քննարկման ժամանակ այս մասին ասաց «Համայնքների ֆինանսիստների միավորում» ՀԿ նախագահ Վահան Մովսիսյանը:

«Թե երբ այս ամենը կունենանք, դժվար է ասել, սակայն խոշորացման գործընթացն այս անգամ լուրջ թափ է ստացել: Ճիշտ ժամանակն է խոսել այն ակնկալիքների մասին, որոնք սպասվում են գործընթացից հետո: Պետք է թեժ պահել թեման և փորձել հասկանալ՝ ինչ է լինելու համայնքների խոշորացումից հետո»,-նշեց նա:

Վահան Մովսիսյանը հատկանշական համարեց, որ համայնքների խոշորացումից հետո 10-12 հաշվապահի փոխարեն համայնքապետարանում պահվելու է 1-2 հաշվապահ, փոխարենը խնայված գումարներով աշխատանքի են ընդունելու փականագործ, անասնաբույժի և այլ մասնագետներ՝ համայնքային աշխատանքներն առավել արդյունավետ կազմակերպելու համար:

Քննարկմանը ներկա, Սյունիքի մարզի Տեղ համայնքի ղեկավար Ներսես Շադունցն իր հերթին հիշեցրեց, որ 2016  թվականի վերջից, երբ Տեղ համայնքը 7 համայնքների հետ միաժամանակ խոշորացվեց, ընդհանուր բյուջեն կազմեց 150 միլիոն դրամ:

«Այս վեց ամիսների ընթացքում ինձ հաջողվել է 7 բնակավայրերից 5-ում կանոնավոր աղբահանություն կազմակերպել, 3  մանկապարտեզ վերանորոգել, կրճատված աշխատողների տնտեսված գումարների հաշվին Խնածախ գյուղում մանկապարտեզ բացել: Այնտեղ 25 երեխա է հաճախում, 6 նոր աշխատատեղ է բացվել: Այնպես որ, համայնքների խոշորացումից չպետք է վախենալ, «բոբո» դարձնել»,- ասաց բանախոսը:

ՀՀ Տարածքային կառավարման և զարգացման նախարարության տեղական ինքնակառավարման վարչության պետ Աշոտ Գիլոյանն էլ նկատեց, որ համայնքների խոշորացմանն առավելապես դեմ են փախստականները՝ չնայած, որ տեղաբնակների հետ կողք կողքի մոտ 30 տարի ապրում են Հայաստանում:

Հարցին՝ որքա՞ն գումար է խնայել պետությունը համայնքների խոշորացման արդյունքում, պաշտոնյան պատասխանեց, որ խնդիրը գումար խնայելու մեջ չէ, այլ ՏԻՄ կառավարումն ավելի արդյունավետ դարձնելը: Նա նաև հերքեց խոսակցությունները, որ համայնքների խոշորացման արդյունքում արտագաղթի տեմպերը կմեծանան:

Աշոտ Գիլոյանը հիշեցրեց, որ նոյեմբերի 5-ին կայանալիք  ՏԻՄ ընտրությունների արդյունքում 793 համայնքներից կխոշորացվեն ևս 325-ը՝ վերածվելով 35-ի: Հաջորդ տարի կխոշորացվի գրեթե նույնքան համայնք, որպեսզի ամբողջ Հայաստանի տարածքում չխոշորացված համայնքներ այլևս չմնան: