Ձեր վստահելի աղբյուրը

Այս տարվա ընթացքում՝ հունիսի առաջին տասնօրյակը ներառյալ միջպետական ոչ կանոնավոր ուղևորափոխադրում իրականացնելու համար ֆիզիկական ու իրավաբանական անձանց նկատմամբ կազմվել է 80 արձանագրություն, որից 13-ը՝ ընթացիկ ամսում:  Panorama.am-ի հետ զրույցում նման տվյալներ ներկայացրեց Տրանսպորտի, կապի և տեղեկատվական տեխնոլոգիաների նախարարության տրանսպորտի տեսչության պետ Անդրանիկ Ասծատրյանը:

Հիշեցնենք, որ միջպետական ոչ կանոնավոր ուղևորափոխադրումներն արգելվում են: Կանոնավոր ուղևորափոխադրումներ կարող են իրականացնել նախարարության կողմից հայտարարված մրցույթում հաղթող ընկերությունները:

«Միջպետական ոչ կանոնավոր ուղևորափոխադրումներ իրականացնողների թիվը մեծ է: Առաջ ավելի շատ էր»,-ասաց տեսչության պետը:

Անդրանիկ Ասծատրյանի խոսքով, Տուլայում տեղի ունեցած վթարից հետո նախարարությունը վարչարարությունն ակտիվացրել է, «Վարչական իրավախախտումների մասին» օրենսգրքում կատարված փոփոխություններով խստացվել են պատիժները:

«Եթե մինչև այս տարվա փետրվարի 24-ն օրենքը սահմանում էր 20 հազար դրամ տուգանք, ապա դրանից հետո ապօրինի ուղևորափոխադրումներ իրականացնող ավտոբուսների համար տուգանքը կազմում է 450 հազար դրամ, իսկ միկրոավտոբուսների համար՝ 150 հազար դրամ»,-ասաց նա:

«Դե Ռոյալ լիդեր» ՍՊԸ-ն, օրինակ, այս տարվա մարտին  Բագրատաշեն մաքսակետի հարևանությամբ  հենց այդքան տուգանվել է:  Այդ օրվա տվյալներով ընկերությանն էր պատկանում նաև այն ավտոբուսը, որը  երկու օր առաջ Վորոնեժում վթարի է ենթարկվել:

Տեսչության պետի փոխանցմամբ՝ այս պահին պարզ չէ, թե ո՞ր ընկերությունն է այդ ավտոբուսի սեփականատերը, քանի որ մարտ ամսից մինչ այժմ կարող է սեփականատերը փոխված լինել: Ակնհայտ է մի բան, այս անգամ էլ ավտոբուսը Երևանից Մոսկվա ուղևորներ է տեղափոխել օրենքի խախտումով:

Հիշեցնենք, որ վթարի պահին ավտոբուսում եղել է 39 մարդ, տուժած երեք քաղաքացիներից երկուսը երեխաներ են:

Panorama.am-ի զրուցակցի խոսքով, քանի որ Տրանսպորտային տեսչությունը մաքսակետերում՝ մասնավորապես Բագրատաշենի մաքսակետում չունի ստացիոնար ստուգայցի կետեր, ուստի անհնար է հանրապետության բոլոր քաղաքներից ապօրինի ուղևորափոխադրում իրականացնողներին վերահսկել:

«Մեր տեսադաշտում այդ կազմակերպությունը չի հայտնվել, գուցե արել է, բայց մենք չենք տեսել: Մենք այդքան ռեսուրս չունենք բոլոր մաքսակետերում պոստ դնելու: Պատկերացրեք, գիշերը ժամը 3-ին Հարավ-արևմտյան թաղամասի էս ինչ հասցեից կամ որևէ մարզի որևէ քաղաքից ցանկացած տրանսպորտային միջոց կարող է իրականացնել ոչ կանոնավոր միջպետական ուղևորափոխադրում: Միակ տարբերակը, որ մենք կարող ենք լիարժեք վերահսկել, մաքսակետերում ստացիոնար պոստ ունենալն է: Միջպետական ուղևորափոխադրումներ իրականացվում են նաև մարզերից»,-ասաց նա:

Վթարված ավտոբուսի վարորդի հետ տրանսպորտի և կապի նախարարությունից չեն կապվել: Տարբեր տեղեկություններով ղեկին եղել է Դավիթ Գրիգորյան անունով քաղաքացի:

«Հասցեն չգիտենք՝ ճիշտն ասած: Այս պահին մեքենայի իրավական վիճակի վերաբերյալ ոչինչ ասել չենք կարող, մեքենան Հայաստանում չէ»,-ասաց տեսչության պետը:

Պաշտոնյան բացատրում է, որ միջպետական ուղևորափոխադրում կարող են իրականացնել նախարարության կողմից հայտարարված մրցույթում հաղթած ընկերությունները, որոնք բավարարում են ներկայացված պահանջներին:

«Պայմանները վերաբերում են ինչպես ավտոմեքնենարի թարմ լինելուն, այնպես էլ վարորդների պատշաճ տեսքին: Մրցույթում հաղթողները նաև մեր վերահսկողության ներքո են, նրանց տնօրինությունը և տրանսպորտային միջոցների, և վարորդների նկատմամբ շատ ուշադիր ու հետևողական է»,-ասաց Անդրանիկ Ասծատրյանը:

Ավելի վաղ նախարարությունից հայտնել էին, որ դեպի Ռուսաստան միջազգային ուղևորափոխադրումներն այսուհետ կիրականցվեն բացառապես ավտոկայարաններից: Դեպի Ռուսաստանի Դաշնություն կանոնավոր նոր երթուղիների կազմակերպման համար հայտարարված մրցույթում  ընտրվել են լավագույն 11 ընկերությունները, որոնք ներկայացրել են մեծ տեղատարողությամբ, հարմարավետ և ուղևորափոխադրման չափանիշներին համապատասխանող ավտոբուսներ և փորձառու վարորդներ:

«Կոչ ենք անում ուղետոմսեր գնել միայն ավտոկայարաններից ու օգտվել  կանոնավոր ուղևորափոխադրողների ծառայություններից, քանի որ այդ փոխադրումները որակապես շա՛տ ավելի բարձր են և, որ ամենակարևորն է, անվտանգ»,- խորհուրդ էին տվել  նախարարությունից: