Ձեր վստահելի աղբյուրը

ՀՀ գյուղատնտեսության նախարար Իգնատի Առաքելյանն այսօր կառավարության նիստից հետո լրագրողների հետ զրույցում անդրադառնալով հարցին, թե կարկտահարությունից տուժած համայնքներին ինչ աջակցություն է տրամադրվելու՝ նշեց,  որ կառավարությունը կփորձի հետևյալ ձևով աջակցել՝  վարկերի սառեցում, հետաձգում, հարկերի, տուրքերի զրոյացում կամ հետաձգում:

Միաժամանակ նախարարն ասաց, որ դա, իրականում, հարցի լուծում չէ. «Դրանով մենք չենք կարողանում փոխհատուցել ամբողջ կրած վնասը: Ամբողջ վնասի փոխհատուցումը ապահովագրական համակարգն է, հակակարկտային ցանցերն են և դրանք էլ թանկ և երկարաժամկետ գործիքներ են»:

Ըստ Իգնատի Առաքելյանի՝  այսօր ամենամեծ խնդիրն այն է, որ գյուղատնտեսությունը ապահովագրված, ապահովված չէ, իսկ դա ռիսկ է:

Միաժամանակ գյուղատնտեսության նախարարն ասաց,  որ 2018 թվականից սկսվելու է ցանցերի և ապահովագրության պիլոտային ծրագիր:

«Ես հուսով եմ, որ երկու-երեք տարվա մեջ տնտեսությունը կգա, կհասնի այն պահանջարկին, որը շուկայում կձևավորվի վճարունակ պահանջարկ՝ այդ համակարգերի ներդրման նկատմամբ, իսկ եթե ոչ, ապա պետք է մեխանիզմ գտնենք, թե ինչպես ապահովենք, ոնց աջակցենք, որ դրանք ներդրվեն: Մենք առանց այդ երկու ծրագրի չենք կարող հարց լուծել, դրանք միանշանակ պետք է ներդրվեն»,- ասաց Իգնատի Առաքելյանը:

Գյուղատնտեսության նախարարի խոսքերով՝  բացի Արմավիրի մարզից, կարկուտից տուժել են Տավուշի, Արագածոտնի մարզերի մի շարք համայնքներ: Ըստ նրա՝ ներկայումս  գնահատում են վնասի չափը:

«Կարկուտը կամ ցրտահարությունը նոր երևույթ չէ Հայաստանում, միշտ եղել է, պարզապես պետք է բոլորս հասկանանք, որ մեր հնարավորությունների սահմաններում կարող ենք ֆինանսական օգնությունը տրամադրել: Կորուստ փոխհատուցելը դա շատ ծանր բեռ է, դրա համար ապահովագրական համակարգ պետք է լինի»,- նշեց Իգնատի Առաքելյանը: