Ձեր վստահելի աղբյուրը

«Առողջապահության նախարարությունը երկու ամիս ժամանակ ունի՝ քննարկելու ծխելու դեմ պայքարի միջոցառումները, որից հետո ձեռնամուխ կլինի ծրագիր մշակելու գործընթացին»,-այս մասին գործադիրի այսօրվա նիստից հետո լրագրողների հետ զրույցում ասաց  ՀՀ առողջապահության նախարար Լևոն Ալթունյանը:

«Սեպտեմբերին ծրագիրը կմշակենք, իսկ դրանից հետո մեկ ամսվա ընթացքում այն կներկայացնենք կառավարություն»,- նշեց  նախարարը:

Ինչ վերաբերում է ծխելու դեմ  հայտարարված միջոցառումների վերաբերյալ արձագանքներին, Լևոն Ալթունյանն ասաց, որ հասարակության 80 տոկոսը կողմ է ծխելու դեմ ամենախիստ պատիժներին, 20 տոկոսը՝ դեմ:

Հարցին, եթե նախարարը ծխեր, ապա կկիրառե՞ր նման օրենք, Լևոն Ալթունյանը պատասխանեց.  «Ես մեկ-մեկ ծխում եմ, բայց դա լինում է շատ հազվադեպ»:

Նախարարը նշեց նաև, որ ժամանակին ծխել է և իրեն իրավունք չէր վերապահում գրասենյակում արգելել ծխելը:

«Հենց որ ես թողեցի  ծխելը, մենք դարձանք չծխող օֆիս»,- հավելեց նա:

Նաև ասաց, որ թեև չի ծխում, բայց չի էլ հորդորում կողքիններին չծխել. «Պատկերացնում եք, բոլորին հորդորեի, կողքս ոչ ոք չէր մնա»:

Դիտարկմանը, թե ծխախոտի թանկացումը կնպաստի նրան, որ ծխողների թիվը նվազի, Լևոն Ալթույանն ասաց, որ ամբողջ աշխարհում դա ամենաազդեցիկ գործիքն է:

Հիշեցնենք, որ Առողջապահության նախարարը հայտարարել էր, որ ծխախոտի դեմ պայքարում անհրաժեշտ են ավելի խիստ գործողություններ: Հայաստանում հակածխախոտային քաղաքականությունների խստացումը թույլ կտա պաշտպանել բնակչության առողջությունը ծխելու վնասակար ազդեցություններից:

«Գաղտնիք չէ, որ հայերս ծխող ազգ ենք: Ես հանձնարարական ունեմ հանրապետության նախագահից և վարչապետից, որպեսզի մենք պատերազմ հայտարարենք ծխելուն, հաղթենք այս չարիքին՝ ծխախոտին։ Այդ կերպ կարող ենք ծխողների քանակը նվազեցնել 30-40 տոկոսով։ Ամենալավ միջոցը մարդու գրպանին հարվածելն է։ Հոգեբանորեն ազդեցություն ունենալն այն չէ, ինչ գրպանին խփելը։ Կարելի է արգելել ծխել այն վայրերում, որտեղ մարդն ուզում է ծխել, և թույլատրել այնտեղ, որտեղ տհաճ կլինի ծխելը»,- ընդգծել էր նախարարը: