Ձեր վստահելի աղբյուրը

«ԼՂ խնդրի կարգավորման հարցում փոխզիջումը չպետք է վնասի Հայաստանի, Ադրբեջանի ժողովուրդներին, և իհարկե Լեռնային Ղարաբաղում ապրողներին»,-ամենշաբաթյա ճեպազրույցում այսօր հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

Նա նշել է, որ կողմերից յուրաքանչյուրը՝ Հայաստանի ու Ադրբեջանի պաշտոնական ներկայացուցիչներն ու պետական գործիչները խնդրի կարգավորման վերաբերյալ իրենց տեսակետն ունեն:

«Նման հին խնդիրների լուծումը ենթադրում է փոխզիջման որոնում: Դա  ենթադրում է կողմերի  դիրքորոշումների մոտեցում, անկախ այն հանգամանքից, թե դրանք որքանով են տրամագծորեն հակառակ կողմերում»,-ասել է Զախարովան, նշելով, որ միջազգային դիվանագիտությունը անլուծելի թվացող խնդիրների համար լուծումներ գտնելու համար է:

«Մենք համամիտ ենք, որ  գործընթացը պահանջում է առաջ ընթանալ: Հենց այդ պատճառով մենք վերջերս ակտիվացրել ենք շփումները: Դրանք տեղի են ունենում տարբեր ձևաչափերում»,-ասել է ԱԳՆ ներկայացուցիչը:

Զախարովայի խոսքով, Ռուսաստանն իր կողմից անում է հնարավորը, որպեսզի այդ փոխզիջումը գտնվի:

«Շատ ենք ուզում, որ այն գտնվի: Ընդ որում, ինչքան շուտ, այնքան լավ»,-ասել է նա:

Անդրադառնալով Մինսկի խմբի համանախագահների՝ տարածաշրջան կատարած այցից հետո Հայաստանի, Ադրբեջանի ու Ռուսաստանի ԱԳ նախարարների հնարավոր հանդիպմանը, ՌԴ ԱԳՆ ներկայացուցիչը նշել է, որ  այս պահին նախատեսված չէ:

«Երբ շփումների վերաբերյալ մանրամասները համաձայնեցվեն, մենք կհայտնենք: Այս պահին ես դրա վերաբերյալ որևէ տեղեկություն չունեմ»,-ասել է նա:

Զախարովան չի բացառել, որ Ֆրանսիայի ԱԳ նախարարի Մոսկվա կատարելիք այցի ժամանակ քննարկվելու է ԼՂ խնդրի կարգավորման վերաբերյալ հարցեր: