Ձեր վստահելի աղբյուրը

«Միացյալ Նահանգների Դաշնային ոստիկանությունը երկու թուրքի է ձերբակալել, ովքեր անցյալ ամիս հարձակվել էին խաղաղ ցուցարարների վրա ԱՄՆ մայրաքաղաքում»,- հաղորդում է Ամերիկայի հայկական համագումարը (Համագումար):

The Daily Caller լրատվականը և Պետքարտուղարությունը ձերբակալված անձանց անունները չեն հրապարակել, սակայն Վաշինգտոնում գործող Washington Hatti թուրքական լրատվական կայքը հաղորդել է, որ հարձակումներում ներգրավված անձանցից մեկն՝ Էյուփ Ելդըրըմը ձերբակալվել է Նյու Ջերսիում և դատարանի առջև կկանգնի Նյու Յորքում:

The Daily Caller լրատվականին տրամադրված հայտարարությունում Պետքարտուղարությունը հաստատել է, որ ձերբակալություններ են կատարվել:

«Այժմ, երբ մեղադրանքներ են ներկայացվել, Պետքարտուղարությունը լրացուցիչ գործողություններ կսահմանի նշված անձանց համար՝ համապատասխան օրենքների և կանոնակարգերի համաձայն: Ցանկացած հետագա քայլ կլինի ներկայացված մեղադրանքներին համարժեք և համապատասխան», - հայտարարել է Պետքարտուղարության մի պաշտոնյա:

«Պետքարտուղարությունը ցանկանում է շնորհակալություն հայտնել Արդարադատության նախարարությանը և քննչական մարմիններին իրենց աշխատասիրության համար: Մտադիր ենք պատասխանատվության ենթարկել մայիսի 16-ի բռնությունների պատասխանատուներին: Ինչպես նախկինում հայտարարել ենք, Միացյալ Նահանգներ կատարած նախագահ Էրդողանի այցի ընթացքում թուրք անվտանգության անձնակազմի վարքի հետ կապված իրադարձությունները մտահոգիչ են»,-ասել է նա:

Անցյալ շաբաթ ԱՄՆ Ներկայացուցիչների պալատը ձայների 397 կողմ և 0 դեմ հարաբերակցությամբ միաձայն ընդունեց Ներկայացուցիչների պալատի 354 բանաձևը, որը դատապարտում է ս.թ. մայիսի 16-ին Թուրքիայի դեսպանի կեցավայրի դիմաց խաղաղ ցուցարարների դեմ բռնությունը և կոչ է անում միջոցներ ձեռնարկել հետագայում նման միջադեպերը կանխելու համար, հաղորդել է Ամերիկայի հայկական համագումարը (Համագումար): Ն.Պ. 354 բանաձևը առաջնորդել էին Ներկայացուցիչների պալատի Արտաքին հարաբերությունների հանձնաժողովի նախագահ Էդ Ռոյսը (հանրապետական, Կալիֆորնիա), ամենաբարձրաստիճան անդամ Էլիոթ Էնգելը (դեմոկրատ, Նյու Յորք), Հանրապետական կուսակցության մեծամասնության խմբի ղեկավար Քևին Մըքքարթին (հանրապետական, Կալիֆորնիա) և Դեմոկրատական կուսակցության երկրորդ ամենաբարձրաստիճան անդամ Սթենի Հոյերը (դեմոկրատ, Մերիլենդ), և կոչ է անում «օրինազանցներին պատասխանատվության ենթարկել»: