Ձեր վստահելի աղբյուրը

«Հյուսիս-հարավ ճանապարհային միջանցքի»  Տրանշ 3-ի` Թալին-Լանջիկ և Լանջիկ-Գյումրի ճանապարհահատվածներում տրանսպորտի, կապի և տեղեկատվական տեխնոլոգիաների նախարար Վահան  Մարտիրոսյանն ընկերության աշխատանքում թերացումներ  էր արձանագրել և հանձնարարել, որ դրանք շուտափույթ վերացվեն: Նախարարության հասարակայնության հետ կապերի վարչության փոխանցմամբ, այդ հատվածում ճանապարհաշինական աշխատանքները կատարում է չինական «Սինոհիդրո Քորփորեյշն» ընկերությունը:

Վահան Մարտիրոսյանը նկատել է, որ շինարարական աշխատանքներում բավական  առաջընթաց է գրանցվել թե՛ շինարարության ընթացքի և թե՛ ներգրավված  տեխնիկայի առումով, սակայն կատարվող աշխատանքի որակը դեռևս գոհացուցիչ չէ:

Տեխնիկական վերահսկողություն իրականացնող ինժեներները նախարարին  հայտնել են, որ արդեն պատրաստ ջրթող խողովակներից երկուսն առանց լաբորատոր  վերահսկողության են կառուցվել, հիմա սխալը շտկվում է։ Վերցվել են նմուշները  և կատարվելու է լաբորատոր հետազոտություն` ստուգելու համար դրանց որակական  համապատասխանությունը պահանջվող չափանիշներին։

Նախարարությունից հայտնում են, որ Վահան Մարտիրոսյանը հանձնարարել է  խիստ վերահսկողությամբ իրականացնել  ստուգումները, և թերություններ արձանագրելու դեպքում ճանապարհաշինական  ընկերությանը պարտադրել վերացնել դրանք։

Նախարարը նշել է , որ բետոնապատումից առաջ պետք է հեռացվի և հետագա  օգտագործման նպատակով պահեստավորվի ճանապարհի ամբողջ սևահողը: Գերմանիայից  Հայաստան ժամանած ինժեներների առջև խնդիր է դրված այն շահագործել այնպես,  որ անհրաժեշտ որակի բետոնե ծածկ ստանան: Նախարարը նշել է , որ ընկերությանն  անհրաժեշտ է վերանայել ինժեներ- մասնագետների իր անձնակազմը, նկատելով, որ  բետոնե շերտը դեռևս որակյալ չէ, և գերմանացի մասնագետները պետք է մնան  այնքան ժամանակ, մինչև կստանան պահանջվող չափորոշիչներին համապատասխանող  ճանապարհածածկ:

Հայաստանում Չինաստանի Ժողովրդական Հանրապետության արտակարգ և լիազոր  դեսպան Թիան Էրլունը, ով նույնպես ուղեկցում էր նախարարին, վստահեցրել է, որ  անձամբ կհետևի, որ չինական ընկերությունը արդարացնի իր վրա դրված  պատասխանատվությունը: