Ձեր վստահելի աղբյուրը

«2017 թվականին, նախորդ տարվա համեմատ, ներգնա տուրիզմի ոլորտում զգալի աճ է արձանագրվել՝ տարվա 2-րդ եռամսյակի արդյունքներով` մոտ 25 տոկոսի չափով»,-լրագրողների հետ այսօր կայացած հանդիպման ժամանակ այս մասին ասաց Հյուրանոցների ասոցիացիայի նախագահ Հակոբ Հակոբյանը:

Անդրադառնալով հյուրանոցային քաղաքականությանը՝ բանախոսը նկատեց՝ առաջարկները գնալով ընդլայնվում են. «Երևանում հնարավոր է մինչև անգամ 5-6 հազար դրամով հյուրանոցային համարներ գտնել: Հայաստանն այս առումով բավական  մրցունակ է: Նախկինում այդպես չէր»։

Ասոցիացիայի նախագահի խոսքով, զբոսաշրջիկների հոսքը գնալով ավելանում է Իրանից և արաբական երկրներից:

Հակոբ Հակոբյանը չհամաձայնեց այն  տեսակետի հետ, որ Հայաստանն արտասահմանցի զբոսաշրջիկներին առաջարկելու քիչ բան ունի:

«Երևանը շատ գեղեցիկ քաղաք է, և զբոսաշրջիկներն այստեղ տեսնելու շատ բան ունեն: Մարդիկ, որպես կանոն, գոհ են մնում մայրաքաղաքի ժամանացային կենտրոններ այցելելուց, տեղական կոնյակը և ուտեստները համտեսելուց: Բացի եկեղեցիներ ու մշակութային վայրեր այցելելուց, զբոսաշրջիկներին առաջարկվում է նաև արկածային, գյուղական տուրիզմ»,- նշեց Հյուրանոցների ասոցիացիայի նախագահը՝ ափսոսանք հայտնելով, որ Հին Երևան ասվածը, ցավոք, դեռևս չկա, մինչդեռ կարող էր մեծ թվով զբոսաշրջիկներ գրավել:

Ասուլիսին ներկա Հայաստանի տուրօպերատորների ասոցիացիայի փոխնախագահ Մարինե Կպրյանն իր հերթին նկատեց, որ հայաստանյան շատ հյուրանոցներ, իրենց փոքր չափերով պայմանավորված, չեն կարողանում զբոսաշրջիների մեծ խմբեր ընդունել:

Նրա պնդմամբ,  արվում է ամեն բան՝ Հայաստան բերելու ոչ միայն տարեց զբոսաշրջիկների, այլ նաև երիտասարդների՝ ապահովելով վերջիններիս հետաքրքիր ժամանցը:

Քննարկման մասնակից «ԷՊԻԿ» միջազգային նախագծի համահիմնադիր Գևորգ Ավետիսյանն էլ անդրադարձավ կրթական տուրիզմի մի հետաքրքիր նախագծի, որն իրականացվելու է «Արմենիա Թրավել» ընկերության հետ համատեղ:

«Կրթական տուրիզմի շրջանակներում նախորդ տարի Հայաստան եկավ 100 ուսանող։ Այս տարի ավելի շատ են գալու։ Հայաստան այցելում են հիմնականում 50-60 տարեկան զբոսաշրջիկներ, և մեր նպատակն է մեր երկիր բերել նաև երիտասարդներին ու ուսանողներին, որպեսզի նրանք ավելի լավ ճանաչեն Հայաստանը, տարածեն ինֆորմացիա մեր երկրի մասին։ Հայաստանը բացակայում է կրթական տուրիզմի քարտեզներևից, և մեր նպատակներից մեկն այն է, որ մեզ դրանցում ներառեն: Այս տարի կրթական տուրիզմի շրջանակներում Ծաղկաձորում օգոստոսի 1-21-ը կանցկացվի ամառային դպրոց-ճամբար։ Կլինեն 200 այլազգի ուսանողներ, 50-100 սփյուռքահայ ուսանողներ, 50 ուսանողներ էլ՝ ՀՀ բուհերից։ Տեղացիների համար ամառային դպրոց-ճամբարի ամբողջական փաթեթը կկազմի 250 հազար դրամ, դա բավականին մատչելի է։ Իսկ այլազգիների ու սփյուռքահայերի համար` 970 եվրո»,- ամփոփեց բանախոսը։