Ձեր վստահելի աղբյուրը

«Արցախից Երևան տեղափոխված զինծառայողների առողջական վիճակը միջին ծանրության է, կարող ենք ասել, որ  նրանց կյանքին վտանգ չի սպառնում»,- Panorama.am-ի թղթակցի հետ զրույցում ասաց ՀՀ ՊՆ Բուժծառայության վարչության պետ Կամավոր Խաչատրյանը:

Նրա խոսքերով՝ Կենտրոնական կլինիկական զինվորական հոսպիտալ տեղափոխված զինծառայողը ստացել է բազմաթիվ բեկորային վնասվածքներ:

«Զինծառայողը գանգուղեղային վնասվածք ունի: Հետազոտությունից հետո բժիշկները որոշել են կոնսերվատիվ բուժում իրականացնել, որից հետո միայն վիրահատել, եթե դրա անհրաժեշտությունը լինի: Եթե արյան հեմատոմայի ծավալը մեծանա, անպայման կվիրահատեն»,- նշեց Կամավոր Խաչատրյանը` հավելելով, որ զինծառայողի գիտակցությունը տեղն է, նրա հետ խոսել է, հիշում է կատարվածը:

Մյուս զինծառայողը, որը տեղափոխվել է «Մալայան» ակնաբուժական կենտրոն, ստացել է աչքերի այրվածք. «Այս պահին չենք կարող աչքերի վիճակը գնահատել, բուժումն ավարտելուց հետո կհասկանանք՝ տեսողության հետ կապված ինչպիսի խնդիրներ կան»:

Հիշեցնենք, որ հունիսի 16-ին՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը  ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.): ԱՀ ՊՆ մամուլի ծառայության հաղորդմամբ, դեպքի մանրամասները պարզելու համար կատարվում է քննություն:

Այսօր առավոտյան  ադրբեջանական կողմը հյուսիսային ուղղությամբ դիմել է հերթական սադրանքի, որի հետևանքով ժամը 09.40-ի սահմաններում մահացու հրազենային վիրավորում է ստացել ՊԲ զինծառայող, 1997թ. ծնված Նարեկ Տիգրանի Գասպարյանը: