Ձեր վստահելի աղբյուրը

ԼՂ խնդրի կարգավորմամբ զբաղվող ԵԱՀԿ Մինսկի խումբը տարածաշրջան կատարած այցից հետո հանդես է եկել հայտարարությամբ:

«Համանախագահների այցի հիմնական նպատակն էր Մոսկվայում ապրիլի 28-ին տեղի ունեցած  եռակողմ հանդիպումից հետո քննարկել կողմերի դիրքորոշումը` Լեռնային Ղարաբաղի հակամարտության խաղաղ կարգավորման գործընթացի հետագա քայլերի վերաբերյալ,  ինչպես նաև հակամարտության գոտում ընդհանուր իրավիճակը»,-ասված է ԵԱՀԿ պաշտոնական էջում հրապարակված հայտարարության մեջ:

Համանախագահները հունիսի 10-ին Երևանում հանդիպել են Սերժ Սարգսյանի, հունիսի 19-ին Բաքվում՝ Ադրբեջանի նախագահ Իլհամ Ալիևի հետ:

«Երկու մայրաքաղաքաներում էլ նրանք խորհրդակցություններ են ունեցել պաշտպանության ու արտաքին գործերի նախարարների հետ: Հունիսի 12-ին համանախագահները մեկնել են Ստեփանակերտ, հանդիպել փաստացի իշխանությունների հետ, այցելել են Լեռնային Ղարաբաղի մի շարք շրջաններ՝ ներառյալ Զանգելան, Կուբաթլու, Լաչին, Քելբաջար շրջաններ: Բաքվում նրանք նաև հանդիպել են Ադրբեջանի՝ ղարաբաղյան համայնքի հետ: Բաքվում տեղի ունեցած բանակցություններում համանախագահները խորին անհանգստության են հայտնել Ադրբեջան իրենց այցի նախօրիեն հրադադարի վերջին խախտումների վերաբերյալ, ինչի հետևանքով շփման գծում զոհեր են եղել: Նրանք դիմել են Ադրբեջանի ղեկավարությանը՝ հորդորելով խուսափել հետագա իրավիճակի սրացումից:  Համանախագահները միևնույն կոչով դիմում են Հայաստանի ղեկավարությանը և Լեռնային Ղարաբաղի դե ֆակտո իշխանություններին:

Նրանք կոչ են անում կողմերին շփման գծում և հայ-ադրբեջականան պետական սահմանին  լարվածության նվազմանն ուղղված քայլեր ձեռնարկել:

Երկու մայրքաղաքներում համանախագահները կողմերին  կոչ են արել խնդրի շուրջ վերսկսել բանակցությունները՝ դրսևորելով բարիդրացիական վերաբերմունք և քաղաքական կամք:  Նրանք շեշտել են, որ սա տարածաշրջանի՝ հակամարտության կարգավորման գործում առաջընթաց ակնկալող  ժողովրդին խաղաղություն պարգևելու միակ ուղին է:

Նախագահները վերահաստատել են քաղաքական երկխոսություն սկսկելու իրենց մտադրությունը խնդրի լուծման վիճահարույց հարցերին փոխզիջումային լուծում գտնելու համար:

Համանախագահները հուլիսի 3-ին կայցելեն Վիեննա՝ Մինսկի խմբի անդամներին զեկուցելու նպատակով: Նրանք նաև նախատեսում են առաջիկայում ևս մեկ անգամ հանդիպել Հայաստանի և Ադրբեջանի ԱԳ նախարարների հետ՝  քննարկելու առաջիկա աշխատանքի ձևաչափը»,-ասված է հայտարարության մեջ: