Ձեր վստահելի աղբյուրը

Տուլայի շրջանում վթարի ենթարկված երթուղային միկրոավտոբուսն իրականացրել է ոչ կանոնավոր ուղևորափոխադրում։ Այս մասին Panorama.am-ին հայտնեցին տրանսպորտի, կապի և տեղեկատվական տեխնոլոգիաների նախարարությունից:

«Ուղևորափոխադրումն իրականացվել է «Իվեկո» մակնիշի մեքենայով։ Այն պատկանել է «Քոչար տրանս տուր» ՍՊ ընկերությանը»,-այս պահին ունեցած տվյալները փոխանցեցին նախարարությունից:

Հիշեցնենք, որ միջպետական ոչ կանոնավոր ուղևորափոխադրումներն արգելվում են: Կանոնավոր ուղևորափոխադրումներ կարող են իրականացնել նախարարության կողմից հայտարարված մրցույթում հաղթող ընկերությունները:

Այս տարվա ընթացքում՝  հունիսի առաջին տասնօրյակը ներառյալ միջպետական ոչ կանոնավոր ուղևորափոխադրում իրականացնելու համար ֆիզիկական ու իրավաբանական անձանց նկատմամբ կազմվել է 80 արձանագրություն, որից 13-ը՝ ընթացիկ ամսում:

Ավելի վաղ նախարարությունից հայտնել էին, որ դեպի Ռուսաստան միջազգային ուղևորափոխադրումներն այսուհետ կիրականցվեն բացառապես ավտոկայարաններից: Դեպի Ռուսաստանի Դաշնություն կանոնավոր նոր երթուղիների կազմակերպման համար հայտարարված մրցույթում  ընտրվել են լավագույն 11 ընկերությունները, որոնք ներկայացրել են մեծ տեղատարողությամբ, հարմարավետ և ուղևորափոխադրման չափանիշներին համապատասխանող ավտոբուսներ և փորձառու վարորդներ:

«Կոչ ենք անում ուղետոմսեր գնել միայն ավտոկայարաններից ու օգտվել  կանոնավոր ուղևորափոխադրողների ծառայություններից, քանի որ այդ փոխադրումները որակապես շա՛տ ավելի բարձր են և, որ ամենակարևորն է, անվտանգ»,- խորհուրդ էին տվել  նախարարությունից: