Ձեր վստահելի աղբյուրը

«Կառավարության ծրագիրը բավականին բազմաբովանդակ է,  ներառված են բոլոր ոլորտները: Ինձ թվում է՝ բավականին կանխատեսելի, իրականացնելի, հավակնոտ ծրագիր է, բավականին մանրակրկիտ, ըստ ոլորտների, բաժանված տարեթվերի»,- ՀՀԿ կենտրոնական գրասենյակում կառավարության անդամների և ՀՀԿ-ականների հանդիպման ավարտից հետո «Ազատություն» ռադիոկայանին ասել է Ազգային ժողովի Հանրապետական խմբակցության ղեկավար Վահրամ Բաղդասարյանը:

Հանդիպմանը ՀՀ վարչապետ Կարեն Կարապետյանը ներկայացրել է կառավարության գործունեության  2017-2022 թթ․ ծրագիրը, որը վաղը ներկայացվելու է ԱԺ արտահերթ նիստում:

Վ. Բաղդասարյանի խոսքով, ծրագիրը պետք է իրականացվի թիմային աշխատանքի արդյունքում: 

«Վարչապետը վստահությամբ  պատրաստակամության է հայտնում կառավարության կողմից, որ պատրաստ են իրականացնելու թվային տվյալները, որոնք ներկայացած են ծրագրում»,- նշեց նա՝ հավելելով, որ բավականին հաջողված ծրագիր է, էապես տարբերվում է նաև մնացած ծրագրերից իր ոճով, մոտեցմամբ:

Վ. Բաղդասարյանն ասաց, որ ծրագրով նախատեսվում է պարբերաբար 5 տոկոս տնտեսական աճ, արտահանման և ծառայությունների գծով ՀՆԱ-ի նկատմամբ 40-45 տոկոս աճ, նվազագույն աշխատավարձի 25 տոկոս աճ, աղքատության 12 տոկոսի կրճատում:

Նա նշեց, որ հինգ տարի անց Հայաստանը կլինի այնպիսին, ինչպեսին ներկայացված է ծրագրում. «Այս պարագայում կունենանք աճողական Հայաստան»: