Պյոտր Սվիտալսկին հույս ունի, որ Հայաստան-ԵՄ նոր համաձայնագիրը նոյեմբերին կստորագրվի

Քաղաքական 13:05 20/06/2017 Հայաստան

Պյոտր Սվիտալսկին հույս ունի, որ Հայաստան-ԵՄ նոր համաձայնագիրը նոյեմբերին կստորագրվի

«Հայաստանը ԵՄ հետ համակողմանի և խորացված նոր համաձայնագրի ստորագրման ուղղությամբ կառուցողական մոտեցում է դրսևորում: ԵՄ-ն ավարտել է տեխնիկական և իրավական շտկումները: Սա այն գործընթացն է, որտեղ հաստատվում են համաձայնագրում առկա բոլոր դրույթներն ու եզրերը»,-այսօր կայացած քննարկման ժամանակ այս մասին ասաց Հայաստանում ԵՄ պատվիրակության ղեկավար Պյոտր Սվիտալսկին:

«Ես կարծում եմ, որ կարող ենք լավատես լինել, և այն հույսը, որ հայտնել է ՀՀ արտգործնախարար Էդվարդ Նալբանդյանը՝ համաձայնագիրը նոյեմբերին ստորագրելու կապակցությամբ, կիրականացվի: Այս փաստաթղթով մենք ընդգծելու ենք այն ուղղությունները, որոնցով շարժվելու ենք առաջ: Ես շատ գոհ եմ ասելով, որ տեխնիկական բանակցություններն ավարտվել են և հուսով ենք, որ ԵՄ-Հայաստան համագործակցության խորհուրդը գրավոր կընդունի գործընկերության դրույթները»,- ասաց նա:

Պյոտր Սվիտալսկիի խոսքով, ԵՄ-ն ջանասիրաբար աշխատում է գործողությունների ծրագրերի վրա՝ սերտորեն համագործակցելով ՀՀ կառավարության հետ:

Դեսպանը նաև նշեց, որ GSP+ արտոնյալ առևտրային սխեմայի մոնիթորինգի նպատակով այսօր Բրուսելից Հայաստան առաքելություն է ժամանել: Այս սխեմայի համաձայն, Հայաստանը հնարավորություն է ստանում իր ապրանքներն ազատորեն դուրս բերել եվրոպական շուկա, սակայն առաջնահերթ պետք է դիտարկի աշխատանքային իրավունքի կոնվենցիայի իրացումը Հայաստանում:

«Սա երկկողմ շահեկան սխեմա է, որը ծառայում է Հայաստանում բարեփոխումների նպատակին»,- ընդգծեց դեսպանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: