Ձեր վստահելի աղբյուրը

Հայաստանում կան շատ մարդիկ, ովքեր հավատում են, որ ԵՄ-ն այս երկրում լավ գործ է անում:Սա մոտիվացի է մեր աշխատանքի համար: Սովորական քաղաքացիների կողմից աջակցությունը մեծ խթան է: Այսօր կայացած քննարկման ժամանակ այս մասին ասաց Հայաստանում ԵՄ պատվիրակության ղեկավար Պյոտր Սվիտալսկին:

«Իհարկե, մենք խոնարհաբար ընդունում ենք, որ կան մարդիկ, ովքեր չեն հասկանում՝ ինչ ենք ցանկանում մենք անել, սակայն մենք ուզում ենք, որ ՀՀ քաղաքացիներն ավելի շատ զգան մեր օժանդակությունը: Ես այստեղ չեմ եկել մասնակցելու հանրային քննարկման: Դա իմ դերը չէ, բայց շատ դրական է, որ արտաքին դիտորդը տեսնում է, որ Հայաստանը ներգրավված է կառուցողական քննարկումների մեջ: Մենք միշտ դրական տրամադրված կլինենք տեսնելով, որ առանցքային հարցերի շուրջ լավ քննարկումներ կծավալվեն»,- ասաց բանախոսը:

Անդրադառնալով հայաստանյան վերջին ընտրությունների վերաբերյալ իր գնահատականներին և ՀՀ իշխանության պատասխան դիտարկումներին՝ Պյոտր Սվիտալսկին նշեց. «Նախքան մեկի վրա հարձակվելը, ստուգել աղբյուրը, նայել տեսանյութը: Նախքան հապշտապ հետևություններ անելը հարգեք ձեր խոսակցին: Սա իմ խորհուրդն ու առաջարկն է  հայերին: Ես չեմ հաղորդել և չեմ հաղորդի ուղերձներ իշխանավորներին՝ հանրային ուղերձների միջոցով: Մենք իշխանությունների հետ շատ լավ, աշխատանքային հարաբերություններ ունենք, հաղորդակցման լավ ալիքներ: Ես կարող եմ անկեղծ երկխոսության մեջ մտնել իշխանությունների հետ: Ոչ մի գնահատական ու կարծիք, որ իմ կողմից հայտնվել է հանրային միջոցառումների ընթացքում, նորություն չէ իմ խոսակիցների համար:

Ինչ վերաբերում է ընտրություններին, ապա ԵՄ-ն Հայաստանին շատ մեծ՝ ավելի քան յոթ միլիոն եվրոյի աջակցություն է տրամադրել:  Իհարկե, մենք դա արել ենք ՀՀ .իշխանությունների բացահայտ խնդրանքի հիման վրա: Եթե մեր աջակցությունն այլևս ցանկալի չէ, մենք մեր ներկայությունը չենք պարտադրի: Մեր աջակցության շնորհիվ էր, որ Հայաստանում շատ բարելավումներ հնարավոր դարձան: Մենք հարգում ենք ՀՀ քաղաքացու սուվերեն ընտրությունը: Մենք պետք է ընդունենք, որ կան աշխատանքային պայմանավորվածություններ, որոնք այլոց հնարավորություն են տալիս արտահայտել կարծիք՝ այս կամ երկրում կատարվողի վերաբերյալ»,- ասաց դեսպանը: