Ձեր վստահելի աղբյուրը

Արցախի պաշտպանության բանակի նախկին հրամանատար Սամվել Բաբայանին առաջադրված մեղադրանքները փոփոխվել են: Panorama.am-ին Ս. Բաբայանի փաստաբան Ավետիս Քալաշյանն ասաց, որ  այժմ նա մեղադրվում է զենքի ապօրինի շրջանառության և փողերի լվացման մեջ:

«Զենքի մաքսանենգությունը դուրս է եկել, դրա փոխարեն մտցվել է փողերի լվացման հոդվածը՝ Քրեական օրենսգրքի՝ 190-րդ հոդվածի (Հանցավոր ճանապարհով ստացված գույքն օրինականացնելը (փողերի լվացումը) 1-ին մաս»,- նշեց նա:

Փաստաբանը միաժամանակ հավելեց, որ Սամվել Բաբայանը երկու մեղադրանքին էլ համաձայն չէ:

Հարցին, թե ի՞նչ հիմքով է փողերի լվացվման մեղադրանք առաջադրվել, Ա. Քալաշյանն ասաց, որ ավելի մանրամասն առայժմ չի կարող տեղեկատվություն հայտնել:

Պատասխանելով հարցին, թե մաքսանենգության մեղադրանքն ի՞նչ հիմքով է հանվել, Ա. Քալաշյանն ասաց. «Այն հիմքով, որ գործով որևէ կերպ չի ապացուցվել, որ Սամվել Բաբայանը կատարել է նման գործողությունններ, այսինքն այն, ինչ մի քանի ամիս շարունակ մենք ասում ենք: Մաքսանենգության հետ որևէ առնչություն չունի»:

Ս. Բաբայանը ձերբակալվել է մարտի 22-ին: ՀՀ Ազգային անվտանգության ծառայության հաղորդմամբ,  մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում ձերբակալված էր 3 անձ, այդ թվում՝ ՀՀ քաղաքացի Սամվել Բաբայանը.  «Կատարված քննչական գործողությունների և օպերատիվ-հետախուզական միջոցառումների արդյունքում ստացվել են նաև արժանահավատ տվյալներ, որ նշված զենիթա-հրթիռային համալիրի բաղկացուցիչ մասերի ձեռքբերումը և փոխադրումն իրականացրած անձինք գործել են Սամվել Բաբայանի հետ ունեցած նախնական համաձայնությամբ և նրա պատվերով»։

Ս. Բաբայանը կալանավորվել է մարտի 24-ին:

Այս գործով նախաքննությունն ավարտվել է: Քրեական գործի նյութերը կուղարկվեն կողմերին՝ ծանոթանալու համար: