Ձեր վստահելի աղբյուրը

«Միավորված ազգերի փախստականների հարցերով գերագույն հանձնակատարի (ՄԱԿ ՓԳՀ) գրասենյակը ողջունում է Հայաստանի կառավարության և բնակչության մեծամասնության կողմից ցուցաբերած պատրաստակամությունը Սիրիայում հակամարտության հետևանքով տեղահանված և Հայաստանում պաշտպանություն հայցող անձանց ընդունելու գործում»,- Փախստականի համաշխարհային օրվա և «Մենք կանգնած ենք Փախստականների կողքին» քարոզարշավի կապակցությամբ լրագրողների հետ հանդիպմանն ասաց Հայաստանում Միավորված ազգերի կազմակերպության Փախստականների հարցերով գերագույն հանձնակատարի (ՄԱԿ ՓԳՀ) ներկայացուցիչ Քրիստոֆ Բիրվիրթը:

Նրա խոսքով, կառավարության աղբյուրի փախանցմամբ, Սիրիայում հակամարտության սկսվելուց ի վեր Հայաստանն ընդունել է ավելի քան 22,000 մարդ, հիմնականում էթնիկ հայկական ծագմամբ: Մինչ նրանցից շատերը տեղափոխվեցին այլ երկրներ, մեկնեցին Պարսից ծոցի արաբական երկրներ որպես աշխատանքային միգրատներ, օգտվեցին վերաբնակեցման հնարավորություններից կամ միացան իրենց ընտանիքների անդամներին մեկ այլ վայրում, ՄԱԿ ՓԳՀ-ի տվյալներով 15,000 տեղահանված դեռևս շարունակում է մնալ Հայաստանում:

Քրիստոֆ Բիրվիրթը նշեց, որ այսօր Հայաստանում շատ սիրիահայ երիտասարդներ արդեն իրենց կրթությունն ավարտել են, անցել աշխատանքի:

«Շատ տեղահանված սիրիահայեր Հայաստանում  կարողացել են աշխատանք գտնել, շատերն ինքնազբաղվածությամբ են գտել վաստակելու հնարավորություն»,- ասաց ՄԱԿ-ի ներկայացուցիչը՝ հավելելով, որ  ՄԱԿ ՓԳՀ գնահատանքով է նշում շատ ընտանիքների գրանցած զգալի առաջընթացը դեպի ինքնաապահովում և հայ հասարակության մեջ ինտեգրում:

«Տեղահանված ընտանիքներից շատերը, օգտվելով իրենց մասնագիտական հմտություններից, իրենց հետ Հայաստան բերած աշխատանքային և ձեռներեցության փորձից, հիմնեցին և այժմ էլ հաջող կառավարում են փոքր և միջին բիզնեսներ՝ փոքր ռեստորաններ, սրճարաններ, ֆուրշետի կազմակերպում, ինչպես նաև գործարաններ և արհեստանոցներ տեքստիլի, կոշիկի և ոսկու արտադրության ոլորտում»,- նշեց նա՝ հավելելով, որ տեղահանված գործարարների և աշխատողների սպասարկման ոլորտում զարգացած մշակույթը, աշխատասիրությունը և աշխատանքի որակը նոր շունչ են տվել Հայաստանի տնտեսությանը և հասարակությանը՝ նպաստելով դրանց զարգացմանը, փոխել են զբոսաշրջության ոլորտը:

«Այսինքն՝ սիրիահայերն իրենց հմտություններն ու փորձը Հայաստան բերելով՝ կարողացել են նպաստել Հայաստանի տնտեսության զարգացմանը»,- ընդգծեց Քրիստոֆ Բիրվիրթը:

Հայաստանում Միավորված ազգերի կազմակերպության Փախստականների հարցերով գերագույն հանձնակատարի ներկայացուցիչը միաժամանակ նշեց, որ չնայած գրանցած առաջընթացին, բազմակողմանի, համակողմանի, քայլ առ քայլ  ինտեգրման գործընթացին, մարտահրավերներ դեռևս առկա են: Նրա խոսքով, դեռ ավելին պետք է անել ինտեգրման բազմաբնույթ գործընթացը հաջողությամբ եզրափակելու համար:

«Որոշ ընտանիքներ, մասնավորապես նրանք, որոնք բաղկացած են տարեցներից, միայնակ ծնողից, ուսանողներից կամ հաշմանդամություն ունեցող անձանցից, ինտեգրման ճանապարհին ավելի շատ խնդիրների էին բախվում: Աշխատունակությունը, սահմանափակ աշխատատեղերը և ցածր աշխատավարձն իրական խոչընդոտներ են նրանց համար»,- ասաց նա՝ հավելելով, որ երկարաժամկետ ապաստանը շարունակում է մնալ մարտահրավեր:

Քրիստոֆ Բիրվիրթի խոսքով, մեծ թվով ընտանիքներ իրենց հեռավոր ապագան տեսնում են Հայաստանում և ցանկանում են անշարժ գույք ձեռք բերել:

«Եկամուտների չափը և մասնավորապես ֆինասների և բարձր տոկոսադրույքների հասանելիության խոչընդոտները դժվար են դարձնում այդ ցանկության իրագործումը: Հաշվի առնելով Հայաստանում բնակարանային շուկան և չօգտագործվող բնակարանների զգալի թիվը՝ խնդիրը ամենևին նոր շինարարություն չի պարտադրում, այլ կարող է լուծվել սուբսիդավորված՝ ցածր տոկոսադրույքով, բնակարանային վարկավորման նախագծի միջոցով, զուգակցված որոշակի դրամաշնորհներով կանխավճարը մարելու համար»,- նշեց Հայաստանում Միավորված ազգերի կազմակերպության Փախստականների հարցերով գերագույն հանձնակատարի (ՄԱԿ ՓԳՀ) ներկայացուցիչ Քրիստոֆ Բիրվիրթը: