Սոցիալական ուղղվածության բարեփոխումներն իրենց արտացոլումն են գտել կառավարության ծրագրում. Ալթունյան
ՀՀ առողջապահության նախարար Լևոն Ալթունյանի ուղերձ է հղել՝ Բուժաշխատողի օրվա առթիվ։
ԱՆ մամուլի ծառայության ներկայացրած ուղերձում ասված է.
«Սիրելի բուժաշխատողներ,
Ընդունեք իմ ջերմ շնորհավորանքը մասնագիտական մեր տոնի` բուժաշխատողի օրվա կապակցությամբ։
Սովորաբար այս տոնն առիթ է խոսելու բժշկի և, առհասարակ` բուժաշխատողի առաքելության, նվիրումի ու փրկված կյանքերի մասին։
Մասնագիտական տոնի կապակցությամբ ցանկանում եմ երախտիքի խոսքեր հղել մեր բժիշկներին, բուժքույրերին ու մայրապետներին, առողջապահության կազմակերպչներին և բոլոր նրանց, ովքեր, հավատարիմ մնալով իրենց առաքելությանը, գիշեր ու ցերեկ մեծ նվիրումով պայքարում են մեր քաղաքացիների կյանքի և ապաքինման համար։
Օրը նաև առիթ է ձեռքբերումներն ամփոփելու և առկա խնդիրներին անդրադառնալու։ Առողջապահական համակարգը քիչ հաջողություններ չի արձանագրել բնակչության առողջության պահպանման, պատշաճ բժշկական օգնության տրամադրման գործում։ Ինչ խոսք, կան նաև դժվարություններ ու չլուծված խնդիրներ։
Այսօր մենք ձեզ հետ միասին ոլորտում լուրջ փոփոխությունների իրականացման սկիզբ ենք դրել։ Տոնական օրը չծանրաբեռնելով` միայն ընդգծեմ, որ սոցիալական ուղղվածություն ունեցող մեր բոլոր բարեփոխումներն իրենց արտացոլումն են գտել կառավարության ծրագրում։
Դրանք մի կողմից միտված են բնակչությանն ավելի որակյալ և հասանելի բժշկական ծառայությունների ապահովմանը, մյուս կողմից` բուժաշխատողի պատվի ու արժանապատվության պաշտպանվածությանը։
Թույլ տվեք մեր տոնի կապակցությամբ մեկ անգամ ևս սրտանց շնորհավորել ինչպես Հայաստանում, այնպես էլ Արցախում և Սփյուռքում աշխատող մեր հայրենակից գործընկերներին։ Բոլորովին վերջերս Բուենոս Այրեսում կայացած Հայ բժիշկների 12-րդ միջազգային համագումարում ձեռք բերված պայմանավորվածությունները հույս են ներշնչում, որ մեր առողջապահության ոլորտում իրականացվող բարեփոխումներին մասնակից կդառնան նաև սփյուռքահայ մեր գործընկերները։
Առանձնահատուկ ուզում եմ շնորհակալություն հայտնել ռազմական բժիշկներին և և սահմանամերձ համայնքների մեր բուժշխատողներին, ովքեր հոգ են տանում հայ զինվորների և սահմանը պահող մեր հայրենակիցների առողջության մասին։
Բոլորիդ մաղթում եմ ամուր առողջություն և անձնական երջանկություն, լավատեսություն և հավատ առ այն, որ համատեղ ջանքերով կկարողանանք երկրի առողջապահական համակարգը դարձնել շատ ավելի լավը»։
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
