Ձեր վստահելի աղբյուրը

«Ելք»  խմբակցության պատգամավոր Էդմոն Մարուքյանին զարմացրել է վարչապետի կողմից կառավարության ծրագրի «անհավես, անէմոցիա, անէքսպրեսիա» ելույթը:

«Դուք այսպիսին չէիք, երբ առաջին անգամ ծրագիրը ներկայացնում էիք»,-ասաց ընդդիմադիր պատգամավորը կառավարության ղեկավարին, ապա հետաքրքրվեց, թե որն է պատճառը:

«Այնպիսի տպավորություն է, որ քիչ առաջ Ձեզ ասել են, որ դուք էլ չեք լինելու վարչապետ»,-կարծիք հայտնեց Մարուքյանը:

Նա ասաց, որ խորհրդարանական ընտրություններից հետո էլ երկիրը սպասումների մեջ է, չկա կարևոր հարցի պատասխան, թե ով է լինելու վարչապետը 2018 թվականին:

«Եթե դուք եք լինելու, այդ բարձր ամբիոնից ասեք, մենք էլ իմանանք, ում հետ ենք բանակցում»,-ասաց պատգամավորը:

Վարչապետն ի պատասխան արձագանքեց. «Անհավես չեմ, ու չգիտեմ, ոնց անեմ, որ նման տպավորություն չթողնեմ: Վարչապետ լինելու եմ, թե չէ, բազմաթիվ անգամ պատասխանել եմ, պատասխանս չի փոխվել: Կառավարության ծրագիրը՝  2017-2022 ֆիքսել ենք, գուցե մասամբ պատասխանում է այդ հարցին»: