Ձեր վստահելի աղբյուրը

«Ուզում եմ ֆիքսել մինչ այժմ իրականացրել ենք այն ամենը, ինչ նախատեսել ենք»,-ԱԺ-ում ներկայացնելով կառավարության առաջիկա 5 տարիների ծրագիրն իր խոսքում ասաց վարչապետ Կարեն Կարապետյանը՝ անդրադառնալով  նախկին ծրագրին:

Նա թվարկեց. «Այսօր ունենք  դրական միտումներ՝ 2017 թվականի հունվար-մայիս ժամանակահատվածում՝ նախորդ նույն ժամանակաշրջանի նկատմամբ արձանագրել ենք տնտեսական ակտիվության 6.4 տոկոս աճ, ընդ որում՝
• արդյունաբերական արտադրանքի ծավալը աճել է 14.4 տոկոս,
• առևտրի շրջանառությունը՝ 12.8 տոկոս,
• ծառայությունների ծավալը (առանց առևտրի)՝ 11 տոկոսով»:

Վարչապետի ներկայացրած տվյալներով, արտահանումն աճել է 21 տոկոսով, իսկ ներմուծումը՝ 24.4 տոկոսով՝ որի կառուցվածքում մեծ աճ է ապահովել հիմնականում ներդրումային նպատակներին ծառայող մեքենասարքավորումների ներմուծումը՝ մոտ 11 տոկոս՝ ապրիլ ամսվա դրությամբ:  

«Հաշվառվող անհատ ձեռնարկատերերի թիվը աճել է 8 տոկոսով, իսկ առևտրային կազմակերպությունների պետական գրանցման աճը կազմում է 13 տոկոս: Ունենք նկատելի աճ օդանավակայանների ուղևորափոխադրման ծավալի մեջ՝ 31 տոկոս, օդային բեռնափոխադրումների մեջ՝ 81.5 տոկոս աճ, թռիչք-վայրեջքների մեջ՝ մոտ 24 տոկոս աճ»,-ասաց վարչապետը:

ԱԺ-ում վարչապետի խոսքն ամբողջությամբ՝ այստեղ: