Գործողությունները չեն բխում Քրեադատավարական օրենսգրքի պահանջներից. «Սասնա ծռերի» գործով դատական նիստից

Իրավունք 17:27 21/06/2017 Հայաստան

Ավան և Նոր Նորք վարչական շրջանների ընդհանուր իրավասության դատարանում այսօր շարունակվում է «Սասնա ծռեր» խմբի 14 անդամի դատավարությունը:

Խմբի անդամներից յուրաքանչյուրը, ով ներս էր մտնում նիստերի դահլիճ, դահլիճում հավաքված քաղաքացիները ծափահարում և գոռում էին նրանց անունները, Պավլիկ Մանուկյանին դիմավորեցին «Հայդուկապետ» բացականչություններով:

Նիստը տարբեր պատճառներով 4 անգամ ընդմիջվեց:

Փաստաբան Ինեսա Պետրոսյանը հայտարարեց, որ այս դատական նիստն անցկացվում է խախտումներով, պաշտպանների մի մասը ծանուցված չլինելու պատճառով չեն ներկայացել դատարան, այսինքն կան անձիք, ովքեր առանց պաշտանի են, բայց դատարանը նիստ է անցկացնում: Նա նշեց, որ ամբաստանյալ Սմբատ Բարսեղյանի պաշտպան Հայկ Ալումյանը ծանուցված չի եղել ու ներկա չէ նիստին, բայց դատարանն այս պայմաններում նիստ է կայացնում:

«Բոլոր գործողությունները, որոնք մինչ այս կատարվել են, գտնում ենք, որ դրանք չեն բխում Քրեադատավարական օրենսգրքի պահանջներից»,- ասաց Ի.Պետրոսյանը:

Դատավոր Արտուշ Գաբրիելյանն ասաց, որ գործի նախապատրաստական փուլն է, դեռևս որևէ գործողություն չի կատարվում, միջնորդություններ չի քննարկվում «որպեսզի ասենք, որ ամբաստանյալի իրավունքները կարող են ոտնահարվել, քանի որ Ալումյանը չկա»:

Այս ժամանակ ամբաստանյալ Վարուժան Ավետիսյանը զինված ապստամբության կոչ արեց:

«Դուք առանց իմ թույլտվության իրավունք չունեք խոսելու»,- ասաց դատավորը:

«Իրավունքը որոշում է մեր Հայաստանի Հանրապետության ապստամբ քաղաքացիները»,-արձագանքեց Վ. Ավետիսյանը:

Դատավոր Արտուշ Գաբրիելյանը դատական սանկցիա կիրառեց նրա նկատմամբ և հայտարարեց ընդմիջում:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: