Ձեր վստահելի աղբյուրը

«Վարչապետից շնորհակալություն ենք հայտնում, որ այնքան հանգամանալից ներկայացրեց, որ ծրագրի հետ կապված հիմնական դիտողություններ չկային: Դիտողությունները ձեր տրամադրության հետ էր կապված, 18 թվին անուն են ուզում»,- Ազգային ժողովի արտահերթ նիստում կառավարության 2017-2022 թթ. ծրագրին հավանություն տալու մասին հարցի քննարկման ասաց ՀՀԿ խմբակցության ղեկավար Վահրամ Բաղդասարյանը:

Այնուհետև դիմելով «Ելք» դաշինքին, նա նշեց.«Հարց եմ տալիս՝ ընտրություններից հետո  գիտիք,  թե ո՞վ է լինելու ձեր խմբակցության ղեկավարը: Գիտե՞ք, թե 2018 թվականին «Ելք» դաշինքում «Լուսավոր Հայաստանը» և Նիկոլ Փաշինյանի կուսակցությունը պետք է նույն դաշինքում լինեն, թե՞ պետք է «Ժառանգության» ճակատագրին արժանանան:Դուք ունեք վարչապետի երկու թեկնածու: Սահմանադրության և ԱԺ կանոնակարգով խմբակցություները ներկայացում են վարչապետի թեկնածուներ: Բնականաբար, մեծամասնությանն է այդ արտոնությունը տրվում: Ձեր համագործակցությունը մեզ հետ առայժմ բավարար չէ: Կհամագործակցեք մինչև 2018 թվականը, եթե գոհ կլինեք, ձեզանից որևէ մեկին  որպես թեկնածու կարող է վերցնենք: Աշխատեք մեզ հետ համագործակցության մասին մտածել»:

Նրա խոսքով, բավական հեգնանքով խոսակցություններ եղան այս ամբիոնից, ընդ որում՝ նորաթուխ քաղաքական գործիչները:

«Ակամայից հիշեցի  երջանկահիշատակ Վահան Հովհաննիսյանի պադեզդի պատմությունը: Խնդրում եմ ՝ հեգնանքով խոսացող այդ նորաթուխ քաղաքական գործիները, որոնք փորձառու վարչապետին, կառավարության մասին խոսում են հեգնանքով, հիշեն պոդեզդի  պատմությունը: Դա շատ վտանգավոր պատմություն է: Չի կարելի այսօր այս քաղաքական համար մեկ ամբիոնից նման հեգնանքով գնահատականներ տալ: Այսօր կառավարության ծրագիրը լիակատար…»,- ասաց նա:

«Ելք» խմբակցության ղեկավար Նիկոլ Փաշինյանը տեղից սկսեց արձագանքել. «Այնպես կխոսենք պադեզդներում, աչքներդ  կչռվի: Տենց բաներ մեր մասին  չասեք»:

Վահրամ Բաղդասարյանն ասաց. «Նիկոլ քու մասին չէ: Խի ես վրեդ վեր ունում:… Դե լավ քո մասին է Նիկոլ»:

«Շշով կտամ վապշե… պադեզդի  մակարդակ ես ուզում…»,-շարունակեց Նիկոլ Փաշինյանը:

«Կարգի հրավիրեք այս երիտասարդին»,- ասաց Վահրամ Բաղդասարյանը:

«Երիտասարդը դու ես»,- արձագանքեց Նիկոլ Փաշինյանը:

Այնուհետև Վահրամ Բաղդասրյանը  շարունակեց իր ելույթը: