Ձեր վստահելի աղբյուրը

Իսրայելի առողջապահության նախարարությունը բողոք է ներկայացրել իրավապահ մարմիններին՝ Հայաստանում բժշկական կրթություն ստացած և երկրում աշխատող ատամնաբույժների դեմ:  Իսրայելական The Marker պարբերականի հաղորդմամբ՝ խոսքն այն բժիշկների մասին է, որոնք Իսրայելում աշխատում են արաբական թաղամասերում:

Ներկայացված բողոքում նշվում է, որ Իսրայելում կան մեծ թվով գործակալներ, որոնք քննությունները ձախողած ուսանողներին առաջարկում են կրթություն ստանալ Հայաստանում: «Առաջարկվող «ծառայությունների փաթեթը» ներառում է կացարան և գրանցում տեղի համալսարանում. արժեքը 10 հազար եվրո»,- նշում է կայքը:

Հայաստան ժամանելով՝ իսրայելցի գործակալի միջնորդն ուսանողին օգնում է համալսարան ընդունվել: Հատկապես նշվում է, որ Հայաստանում իսրայելցի ուսանողների, ավելի վաղ ստացած գիտելիքները չեն ստուգվում, և նրանք ուսումն անմիջապես շարունակում են երկրորդ-երրորդ կուրսից:  Ուսման ավարտին նրանք ատամնաբույժի դիպլոմ են ստանում:

Ըստ աղբյուրի՝ հետագայում այդ նույն գործակալները  ուսանողներին օգնում են որոշակի գումարի դիմաց Իսրայելում հայկական դիպլոմներով արտոնագիր ստանալ, ինչը նրանց հնարավորություն է տալիս բժշկական գործունեություն ծավալել:

Ավելի վաղ Իսրայելի առողջապահության նախարարությունը հայտարարել էր Հայաստանի բժշկական բուհերի շրջանավարտների համար հավելյալ քննություններ անցկացնելու որոշման մասին, որի նպատակն է ամրապնդել նրանց գիտելիքները և որակավորման լիցենզիա տրամադրելը:

Panorama.am-ը փորձեց մեկնաբանություն ստանալ ՀՀ կրթության և գիտության նախարարությունից, սակայն ասացին, որ իրենք չեն մեկնաբանում: 

Panorama.am-ին մեկնաբանություն տրամադրեց Երևանի պետական բժշկական համալսարանի մամուլի պատասխանատու  Շուշան Դանիելյանը:

Մեզ հետ զրույցում մամուլի պատասխանատուն նշեց, որ մամուլում տեղ գտած տեղեկատվությունն այն մասին, որ հայ բժիշկներն Իսրայելում աշխատելու հարցում այսուհետև խոչընդոտների են հանդիպելու, չի վերաբերում բժշկական մայր բուհի շրջանավարտներին, որոնք այսօր աշխարհի տարբեր անկյուններում, ամենահեղինակավոր առողջապահական կազմակերպություններում առաջատար պաշտոններ են զբաղեցնում:

«Իսրայելի առողջապահության նախարարության հայտարարության թիրախը բնավ 100-ամյա ճանապարհ անցած և թե քաղաքացիական, թե պատերազմական իրավիճակում մեր երկրի, մեր ժողովրդի համար առողջապահության մասնագետներ ապահովող Երևանի Մխիթար Հերացու անվան պետական բժշկական համալսարանը չէ: Կարևոր եմ համարում նշել նաև, որ Մասնագիտական կրթության որակի ապահովման ազգային կենտրոնի (ՈԱԱԿ)-ի կողմից ինստիտուցիոնալ հավատարմագրում ունի միայն Երևանի Մ․ Հերացու անվան պետական բժշկական համալսարանը։ Այս հանգամանքը ևս փաստում է, որ ԵՊԲՀ-ի ուսումնական ծրագրերը բժշկական բոլոր մասնագիտությունների գծով և դասավանդման լեզուներով համապատասխանում են միջազգային ստանդարտներին, որը գործնականում ապացուցված է թե բուհի կողմից պատրաստված բժիշկ-մասնագետների տեսական բարձր գիտելիքներով եւ թե նրանց գործնական ունակություններով»,- ասաց Շուշան Դանիելյանը:

Նա նաև հայտնեց, որ  վերջին 6 տարիների ընթացքում ԵՊԲՀ-ն ավարտել է 10 իսրայելցի ուսանող, և որևէ խնդիր, դժգոհություն, կապված նրանց հետագա մասնագիտական գործունեության հետ, բուհը չի ստացել:

«ԵՊԲՀ շրջանավարտներն աշխարհի մոտ 40 երկրում են աշխատում, իսկ ներկա պահին 26 երկրից ավելի քան 1700 ուսանող, այդ թվում՝ նաև Իսրայելից, ԵՊԲՀ-ում ստանում է բժշկական կրթություն: Ինչպես նաև Բժշկական համալսարանի 4200-ից ավելի շրջանավարտներ այսօր հաջողված մասնագիտական գործունեություն են ծավալում տարբեր երկրների բժշկական կազմակերպություններում: Վերջերս էլ Հորդանանի պաշտոնական մարմինները ճանաչել են բժշկական բոլոր մասնագիտություններով ԵՊԲՀ բազային կրթության որակավորումը»,- հայտնեց Երևանի պետական բժշկական համալսարանի մամուլի պատասխանատուն:

Փորձեցինք մեկնաբանություն ստանալ նաև մասնավոր այն բուհերից, որոնք  բժշկական դիպլոմներ են տալիս:

«Հայբուսակ» համալսարանից պատասխանեցին, որ  ռեկտորը միայն հաջորդ շաբաթ բուհում կլինի, համալսարանի Բժշկական ֆակուլտետի դեկան Յանինա Մարինոսյանն էլ մեր զանգերին չպատասխանեց:

Մայր Թերեզայի անվան համալսարանից  էլ մի կին, որը չներկայացավ՝ ասաց, որ իրենց բուհն ունի հավատարմագիր: Հարցին, թե  համալսարանում կա՞ն արտերկրից սովորող ուսանողներ, նա դրական պատասխան տվեց, սակայն հրաժարվեց թիվ հրապարակել: Ճշտող հարցին՝  բուհում իսրայելցի ուսանողներ կան, տիկինը  հարցից հետո հեռախոսն անջատեց: