Ձեր վստահելի աղբյուրը

Կառավարության այսօրվա նիստում պաշտպանության նախարար Վիգեն Սարգսյանը կառավարության հաստատմանը ներկայացրեց  Կառավարությանն առընթեր ՀՀ ոստիկանության «Ճանապարհային ոստիկանություն» ծառայության արտաբյուջետային ֆոնդի օգտագործման ուղղություն սահմանելու, Հայաստանի Հանրապետության 2017 թվականի պետական բյուջեում և Հայաստանի Հանրապետության կառավարության 2016 թվականի դեկտեմբերի 29-ի N 1313-Ն որոշման մեջ փոփոխություններ և լրացումներ կատարելու մասին նախագիծը։

Վիգեն Սարգսյանը հայտնեց, որ նախագծի նպատակն է բարելավվել ՀՀ կառավարության կողմից հաստատված ծրագրով զոհված, մահացած ու հաշմանդամություն ունեցող զինծառայողների ընտանիքների բնակարանային պայմանները:

Այսպիսով, տեղադրված տեսախցիկների արձանագրած խախտումների գումարներով հաշմանդամության առաջին կարգ ունեցող զինվորները, զոհված ազատամարտիկների ու զինծառայողների ընտանիքների բնակարանային խնդիրները կլուծվեն:

Վիգեն Սարգսյանը հայտնեց, որ այս փոփոխությամբ կատարում են ՀՀ նախագահի հանձնարարականը և մինչև տարեվերջ բոլոր ընտանիքների բնակարանային խնդիրը լուծված է լինելու:

Նախարարի խոսքերով՝  հաջորդ տարի այս ծրագիրը կուղղվի 2-րդ կարգի հաշմանդամություն ունեցող զինծառայողների խնդիրները լուծելու համար։ 

Վարչապետ Կարեն Կարապետյանը արձագանքեց. «Շատ լավ գործ է»։