Ձեր վստահելի աղբյուրը

Ազգային ժողովում «Հայաստանի Հանրապետության 2016 թ. պետական բյուջեի կատարման մասին» տարեկան հաշվետվության ժամանակ ՀՀ ֆինանսների նախարար Վարդան Արամյանը, պատասխանելով  ՀՅԴ խմբակցության պատգամավոր Արմենուհի Կյուրեղյանի հարցին, թե ինչքա՞ն և մինչև ե՞րբ է հնարավոր պարտք վերցնել, ասաց, որ  բոլոր ներկայացված ցուցանիշները հարաբերական են, այսինքն՝ երբ խոսվում է պետական պարտքի մասին, պիտի համեմատական արվի ՀՆԱ-ի հետ:

Նրա խոսքերով՝  անվանական առումով պարտքի մեծացումը խնդիր չէ. «Ակնհայտ է, որ եթե քո եկամուտները չեն հերիքում ծախսերդ կատարելու համար, դու պետք է ծախս վերցնես. առանց դրա հնարավոր չէ»:

Պատասխանելով հարցին՝ մինչև ե՞րբ կարելի է պարտք վերցնել, Վարդան Արամյանն  ասաց. «Մենք շարունակելու ենք պարտք վերցնել, սակայն ամենակարևորը այդ հարաբերական ցուցանիշների կամաց-կամաց կարգավորելն է»:

Ըստ նախարարի՝ պետք է պարտք վերցնել, որ տնտեսական աճ լինի:

«Այսինքն՝ եթե ես կարողանում ես այնպես աշխատել, որ տնտեսական աճն ավելի լինի, քան պարտքը, պիտի պարտք վերցնեմ: Պարտք-ՀՆԱ ցուցանիշը պետք է կայունանա շնորհիվ ՀՆԱ-ի աճի: Մենք չպետք է կրկնենք  Հունաստանի ձախողումը: Հունաստանն անմիջապես գնաց պարտքերի միանգամից կրճատման՝ հաշվի չառնելով, աշխատողների զգալի մասն աշխատում էր պետական հատվածում, առանց ռեֆորմի անելու` գնաց պարտքի կտրուկ կրճատման, ու սա ավելի խորացրեց իրավիճակը: Ճիշտ քաղաքականությունը պարտք վերցնելն է, շեշտադրումը կապիտալ ծախսերի վրա պետք է լինի, ընթացիկ ծախսերն էլ պիտի վերաիմաստավորել»,- ընդգծեց Վարդան Արամյանը: