Ձեր վստահելի աղբյուրը

«Ժառանգություն» կուսակցությունը շարունակում է հավատարիմ մնալ իր քաղաքական վեկտորին և ինչպես նախկինում էր հայ ժողովրդի և Հայաստանի շահերը պաշտպանող կուսակցություն, այդպիսին էլ շարունակելու է լինել ապագայում։ Panorama.am-ի թղթակցի հետ զրույցում այս մասին ասաց «Ժառանգություն» կուսակցության փոխնախագահ Արմեն Մարտիրոսյանը։

«Այն գաղափարախոսական հենքը, որը եղել է ի սկզբանե, պահպանվելու է։ Իհարկե, նախօրեին կայացած համագումարից հետո որոշ դրույթներ հարստացվել են։ Ծրագրային մի քանի կետեր ենք առաջարկել՝ սահմանադիր ժողովի հրավիրում՝ կոնկրետ Սահմանադրության փոփոխության հարցով, լյուստրացիայի, աշխատավարձերի ինդեքսացիայի և ավանդների վերադարձի հետ  մոտեցումներ և այլն»,- ասաց նա։

Արմեն Մարտիրոսայնից հետաքրքրվեցինք՝ ինչպե՚՞ս է կուսակցությունը պատրաստվում կյանքի կոչել վերը թվարկված ծրագրերը, եթե խորհրդարանում ներկայացված չէ և օրենսդրական լծակների չի տիրապետում։

«Ժառանգություն» կուսակցության փոխնախագահը շեշտեց՝ դա ամենևին կապ չունի։
«2003 թվականին, երբ կուսակցությունն իր գործունեությունը սկսեց և խորհրդարանում էլ ներկայացված չէր, ծրագիր չունե՞ր»,- զարմացավ նա։

Հարցին՝ ի՞նչ փուլում է «Ժառանգության» ընդլայնման ծրագիրը, որի մասին վերջերս հայտարարել էր կուսակցության առաջնորդ Րաֆֆի Հովհաննիսյանը, Արմեն Մարտիրոսյանը նշեց՝ գործընթացը նոր է մեկնարկել, սակայն մի բան հստակ է՝ ընդդիմադիր դաշտը պետք է հնարավորինս մեկտեղվի։ Թե հատկապես որ կուսակցությունների հետ «Ժառանգությունը» կցանկանար միավորվել, մեր զրուցակիցը խուսափեց անուններ հնչեցնել։

Հիշեցնենք, որ հունիսի 25-ին՝ «Ժառանգություն» կուսակցության 11-րդ համագումարի ժամանակ, տեղի էր ունեցել քվեարկություն, որի ընթացքում կուսակցության անդամներն ընտրել էին վարչության անդամներին: Քվեարկության արդյունքում առաջադրված 20 թեկնածուներից վարչության անդամ էր ընտրվել 15-ը։

«Ժառանգություն» կուսակցության նորընտիր վարչության անդրանիկ նիստին վարչության նախագահ է ընտրվել Րաֆֆի Հովհաննիսյանը: