Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում շարունակվում է  Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով դատական նիստը:

Նիստն ընթացավ առանց Ժիրայր Սեֆիլյանի, Ներսես Պողոսյանի, Գևորգ Սաֆարյանի, քանի որ նրանց նկատմամբ սանկցիաներ էին կիրառվել և նրանք հեռացվել էին դատական նիստերի դահլիճից: Դատական նիստին ներկա չէին նաև որոշ փաստաբաններ:

Նշենք, որ մասնավորապես Ժ. Սեֆիլյանի փաստաբան Տիգրան Հայրապետյանին, Ն. Պողոսյանի փաստաբան Արայիկ Պապիկյանին դատական կարգադրիչները  թույլ չէին տվել մուտք գործել դատարան, քանի որ նրանք հրաժարվել էին թույլ տալ ստուգել իրենց պայուսակները:

Նիստը նախագահող դատավոր Տաթևիկ Գրիգորյանն ասաց, որ դատարան է ստացվել արձանագրություններ անձին զննության ենթարկելու վերաբերյալ, որոնք կազմվել են դատական կարգադրիչների կողմից, մասնավորապես՝ Դատական օրենսգրքի 214-րդ հոդվածի 1-ին մասի 3-րդ կետի հատկանիշների  (Դատական կարգադրիչի իրավունքները և պարտականությունները իր գործառույթների կատարման ընթացքում. Դատական կարգադրիչն իր գործառույթներն իրականացնելու նպատակով իրավունք ունի քնության ենթարկելու դատարան կամ դատական նիստերի դահլիճ մուտք գործող անձանց և նրանց իրերը) համաձայն զննության են ցանկացել ենթարկել փաստաբաններ Տիգրան Հայրապետյանին, Արայիկ Պապիկյանին, սակայն նրանք հրաժարվել են:

«Դատարանն արձանագրում է, որ փաստաբաններ Արայիկ Պապիկյանը, Տիգրան Հայրապետյանը դատական նիստին ներկա չեն: Դատարանը հեռանում է  խորհրդակցական սենյակ պաշտպանների վարքագծի վերաբերյալ համապատասխան որոշում կայացնելու համար»,- ասաց  դատավոր Տ. Գրիգորյանը:

Խորհրդակցական սենյակից վերադառնալուց հետո դատավորը հայտարարեց, որ փաստաբաններ Հայրապետյանի և Պապիկյանի նկատմամբ կիրառվում է դատական սանկցիա՝ պատասխանատվության ենթարկելու  վերաբերյալ դիմումով դիմելով Փաստաբանների պալատ:

Մինչ այդ դատավորը հայտարարել էր դատական սանկցիա է կիրառվում նաև փաստաբան Տիգրան Եգորյանի նկատմամբ՝ պատասխանատվության ենթարկելու  վերաբերյալ դիմումով դիմելով Փաստաբանների պալատ:

«Հետաքրքիր է, թե կոնկրետ իմ որ գործողության կապակցությամբ է դատարանը իմ նկատմամբ որոշել սանկցիա կիրառել: Եթե նման հնարավորություն կգտնեք, խնդրում եմ բացահայտել այդ հանգամանքն ինձ համար, որպեսզի ես կարողանամ ներկայացնել առարկություն,  հակառակ դեպքում դատարանն ինձ զրկում է այդ որոշման կապակցությամբ առարկություն կամ հայտարարությամբ հանդես գալու հնարավորությունից, քանի որ չեմ տիրապետում պատճառներին»,-  ասաց փաստաբան Եգորյանը:

Դատավոր Տ. Գրիգորյանը հայտարարեց, որ դատավարության որևէ մասնակից, նաև պաշտպանության  կողմը իրավասու չէ դատարանին ներկայացնելու պահանջ դատարանի կողմից կայացված որոշումները, գործողությունները պարզաբանելու կամ մեկնաբանելու առումով:Դատավորը նաև ասաց, որ եթե փաստաբանը ցանկանում է ստանալ դատարանի որոշման օրինակը,  մեկ աշխատանքային օրվա ընթացքում կարող է ստանալ, որից հետո սահմանված ընթացակարգերի պահպանմամբ ներկայացնել առարկություն կամ հանդես գալ հայտարարությամբ:

Դատավոր Տ. Գրիգորյանը նաև հայտարարեց, որ Շենգավիթ վարչական շրջանի ընդհանուր իրավասության դատարանի  դատական կարգադրիչների ստորաբաժանման պետի կողմից դատարանին ներկայացվել է զեկուցագիր, ըստ որի՝ դահլիճում գտնվող Վահե Պողոսյանն ու Վահագն Ղումաշյանը դատարանի հանդեպ անհարգալից վերաբերմունք են ցույց տվել՝ հայհոյանքներ հնչեցնելով դատարանի հասցեին, խոչընդոտել են նաև կարգադրիչների ծառայությունը: Դատարանի որոշմամբ նրանք հեռացվեցին դատական նիստերի դահլիճից՝  մինչև այս քրեական գործի դատաքննության ավարտը: